Qeveria suedeze do të mbështesë Policinë e Shtetit për rritjen e besimit të ndërsjelltë dhe partneritetin me komunitetin përmes ndërveprimit.
Ministri i Punëve të Brendshme, Saimir Tahiri, si dhe shefja e sektorit të Bashkëpunimit për Zhvillim në Ambasadën e Suedisë, Birgitta Jansson nënshkruan të enjten në Tiranë marrëveshjen për projektin “forcimi i policimit në komuntet, 2017 – 2020”.
Projekti është propozuar nga pala suedeze pas konsultimit me aktorë institucionalë në Shqipëri, të shoqërisë civile dhe aktorë ndërkombëtarë.
Programi bazohet në tre shtylla të lidhura ndërmjet tyre mbështetje për policimin në komunitet në Drejtorinë Rajonale të Policisë; mbështetje për menaxhimin strategjik; si dhe mbështetje për luftën kundër dhunës në familje.
Projekti do të zbatohet për katër vitet në vijim, me një buxhet rreth 3.3 milion euro. Financimet do të përqendrohen për trajnime, mbështetje në infrastrukturë për Policinë e Shtetit si dhe në fushata ndërgjegjësuese për çështjet e policimit në komunitet.
Rritja e kapaciteteve synon të përmirësojë aftësitë e Policisë së Shtetit në dhënien e shërbimit, si dhe të rrisë besimin e dëshirën e qytetarit dhe komuniteteve për të bashkëpunuar në mënyrë aktive me Policinë e Shtetit. Kjo sipas Policisë së Shtetit, ndikon drejtpërdrejt në reduktimin e veprave penale./b.d
