Shtypi gjerman rikthehet të flasë për ngjarjen në Kumanovë, zonën e populluar nga shqiptarë dhe ku mbetën të vrarë 22 persona. Në një artikull të titulluar “Kaos në Maqedoni” gazeta gjermane “Sueddeutsche Zeitung” e cilëson aksionin në Kumanovë si një ngjarje të inskenuar nga qeveria e Nikola Gruevskit.
Sipas gazetës, opozita ka zbuluar se qeveria e Gruevskit ka përgjuar rreth 20 mijë qytetarë në mënyrë të paligjshme.
Sipas kësaj gazete, përgjimet që po zbulohen nga opozita kanë bërë që të ngritet dyshimi se Gruevski ka organizuar incidentin në mënyrë që të arrijë ta mbajë pushtetin.
“Edhe ekspertët kanë frikë se qeveria ka organizuar incidentin përgjakshëm. Ish-shefi i inteligjencës Goran Mitevski tha se tingëllon e palogjikshme që një grup i armatosur rëndë të futet në vend pa u vënë re nga autoritetet. Ndërsa ish-gjenerali Ilija Nikollovski beson se terroristët e pretenduar janë në fakt mercenarë,” shkruan “Sueddeutsche Zeitung”.
Ndërsa nga ana e tij kreu i opozitës Zaev deklaron se ka prova, se qeveria kishte më shumë se një vit e gjysmë që kishte informacion mbi këtë grup të armatosur.
“Ambasadorët e Gjermanisë, SHBA-ve, BE-së, Britanisë së Madhe, Francës dhe Italisë, pas takimit me kryeministrin dhe kreun e opozitës, nuk thanë asnjë fjalë të vetme për grupin e armatosur dhe nuk i quajtën ata terroristë, por vetëm folën për një “tragjedi”, nënvizon gazeta gjermane.
