Ashtu siç edhe ishte paralajmëruar, Shtetet e Bashkuara të Amerikës kanë evakuuar diplomatët dhe familjarët e tyre nga Sudani, për shkak të luftimeve të ditëve të fundit pas tentativës për grusht shtetit të një grupi paramilitarësh që kanë shkaktuar qindra viktima dhe mijëra të lënduar.
Lajmi u konfirmua nga vetë presidentit Joe Biden, i cili deklaroi se stafi i ambasadës në Khartum dhe ndihmësit e tjerë në këtë seli diplomatike u evakuuan me helikopter gjatë natës.
“Sot, me urdhrin tim, ushtria e Shteteve të Bashkuara kreu një operacion për të nxjerrë personelin e qeverisë amerikane nga Khartoum,” tha Biden përmes një deklarate.
Një zyrtar amerikan tha se rreth 100 njerëz u evakuuan herët të dielën, kur tre helikopterë Chinook zbritën pranë selisë së ambasadës amerikane.
Grupi paramilitar dhe ushtria prej ditësh po përballen fuqishëm me armë në Sudan me synim pushtetin, ndonëse kishin shpallur dhe një armëpushim për Bajram, i cili duket se nuk u zbatua asnjëherë.
Ky ishte evakuimi i dytë i shtetasve të huaj që nga shpërthimi i dhunës në kryeqytetin e Sudanit javën e kaluar.
Të shtunën, më shumë se 150 qytetarë, diplomatë dhe zyrtarë ndërkombëtarë u evakuuan nga deti në portin e Arabisë Saudite. Ata ishin kryesisht shtetas nga vendet e Gjirit, si dhe nga Egjipti, Pakistani dhe Kanadaja.
/a.r
