Irlanda, Britania e Madhe dhe Franca u përballën sot me nje kaos udhëtimesh – ndërsa një person ka vdekur për shkak të stuhisë – që goditi Evropën veriperëndimore me erëra të forta, shira të dendura, borë dhe akull.
Policia e Hampshire në Anglinë jugore tha se një person kishte vdekur – pasi një pemë kishte rënë mbi një makinë në një rrugë kryesore pranë Winchester sot në mëngjes.
Stuhia “Bert” shkaktoi ndërprejen e energjisë për të paktën 60 000 prona në Irlandë – si dhe mbylljen e rrugëve të trageteve dhe trenave në të dy anët e Detit Irlandez.
Portet dhe aeroportet e La Manshit në Britaninë e Madhe ishin vendet më të goditura nga stuhia, ndërsa në Francë, dhjetëra mijëra banesa mbetën pa energji elektrike pas stuhisë “Caetano” të enjten.
Qindra pasagjerë mbetën të bllokuar kur trenat u ndaluan nga ndërprerjet e energjisë elektrike.
Pamjet treguan përmbytje në perëndim të Irlandës, të cilat shkaktuan gjithashtu mbyllje të transportit hekurudhor në Irlandën e Veriut. Bora ndikoi në transport në të gjithë Britaninë e Madhe.
Bora më e madhe goditi Skocinë dhe disa pjesë të Anglisë veriore dhe qendrore, me dhjetëra alarme për përmbytje.
Zyra Meteorologjike në Britaninë e Madhe lëshoi paralajmërime për borën dhe akullin në këto rajone, duke thënë se në disa komunitete rurale do të ndërpritej energjia.
Bora në kodrat skoceze arriti deri në 40 centimetra, ndërsa në Britanine e Madhe u regjistruan erëra me shpejtësi 113 kilometra në orë.
Operatori i trageteve DFDS anuloi shërbimet në disa rrugë deri të hënën, me lundrimet nga Newhaven dhe Dover në Anglinë jugore për në Dieppe dhe Calais në Francë të prekur rëndë.
Fluturimet u ndërprenë në aeroportin e Newcastle për shkak të borës së madhe, me disa fluturime të devijuara në Belfast dhe Edinburg.
