Ka pasur edhe pak Shqipëri në fitoren befasuese të Lazio-s kundër Juventus në Superkupën e Italisë.
Thomas Strakosha është bërë lojtari i parë shqiptar që fiton një trofe në Itali pas Riza Lushtës, që ka fituar Kupën e Italisë me Juventus në 1942-in.
22-vjeçari ka bërë një tjetër paraqitje mbresëlënëse për bardhekaltrit, të cilët kanë vuajtur kundër Juventus në minutat e para të takimit, por portieri shqiptar ka arritur ta mbajë të paprekur rrejtën e portës së tij falë disa pritjeve të njëpasnjëshme në harkun e pak minutave.
Pas kësaj trullosje fillestare skuadra e Simone Inzaghi ka dalë në lojën e saj dhe e ka merituar fitoren.
“NO BONUCCI, NO PARTY” – Nga Chiellini dhe deri te Buffon, pa harruar Khedira, që para ndeshjes së sotme ka thënë se kjo Juventus është më e fortë se ajo e vitit të kaluar, të gjithë brenda klubit bardhezi duket se kanë nënvlerësuar largimin e Leonardo Bonucci. Kjo duket qartë edhe nga mungesa e përforcimeve në repartin e mbrojtjes. Por Leo ishte më shumë se një mbrojtës, sepse nga këmbët e tij nisnin pjesa më e madhe e aksioneve të skuadrës së Allegri-t, që tani duket qartë se është në vështirësi. Rreziku është që Bonuçi të kthehet në një Pirlo i dytë. Milan (në atë kohë i drejtuar nga Allegri) e la mesfushorin të largohej tek Juventus dhe pjesa tjetër është histori.
IMMOBILE – Në një intervistë të dhënë javën e kaluar kishte thënë se donte ta ndëshkonte Juventus-in me një gol “alla Del Piero”. Ciro Immobile, sulmuesi i Lazio-s, e ka realizuar përgjysmë dëshirën e tij. Në fakt, ka qenë ai që ka ndëshkuar “Zonjën” në minutën e 32-të, me një penallti të fituar nga vetai, dhe në të 54-ën, me një goditje të bukur me kokë.
ZGJIMI I VONUAR – Reagimi i Juventus ka qenë i vonuar dhe ka ardhur pesë minuta para fundit të takimit, kur Dybala ka realizuar me një goditje dënimi perfekte, ndaj së cilës Strakosha nuk mund të bënte asgjë. Pesë minuta më vonë bardhezinjtë kanë barazuar ndeshjen përsëri me Dybala, i cili nuk ka gabuar penalltinë e dyshimtë e fituar nga Alex Sandro. Kur mendohej se ndeshja do të shkonte në shtesë ka ardhur goli i Murgia, i realizuar në minutën e 93-të, që ka çuar në delir tifozët lacialë dhe i ka dhuruar bardhekaltërve një fitore të jashtëzakonshme. Ndoshta, po të kishte qenë Bonucci, ai gol mund të ishte shmangur…
STATISTIKAT
– Lazio nuk kishte shënuar kundër Juventus në shtatë ndeshjet e fundit (nga maji i 2015-ës).
– Kjo ka qenë Superkupa e Italisë numër nëntë për Gianluigi Buffon, një rekord që portieri bardhezi e ndan me Dejan Stankovic
– Juventus nuk humbte një ndeshje kundër Lazio-s prej 14 takimesh të njëpasnjëshme: 13 fitore dhe 1 barazim
– Kjo ka qenë Superkupa e Italisë numër katër pë Lazio-n, që dy herët e fundit ishte mundur në finale pikërisht ndaj Juventus
– Paulo Dybala ka shënuar 7 gola në 8 ndeshje të luajtura kundër Lazio-s.
/telesport/b.d
