Sekretari i përgjithshëm i NATO-s, Jens Stoltenberg, ka ftuar talebanët për të marrë pjesë në procesin e pajtimit në Afganistan, pas një takimi me presidentin Ashraf Ghani në Kabul, bëri të ditur shtypi vendas.
“Vazhdimi i luftës është i kotë dhe nëse talebanët duan të jenë pjesë e Afganistani në të ardhmen, ata duhet të ulen në tryezën e bisedimeve”, theksoi Stoltenberg.
Presidenti Ghani tha se “talebanët janë vetëm një faktor në konflikt dhe se betejat në vazhdim kanë shumë dimensione që duhet të trajtohen”.
Stoltenberg dhe një delegacion i lartë u takua me presidentin afgan, Ashraf Ghani, drejtorin e përgjithshëm Abdullah Abdullah, si dhe komandantin e forcave ndërkombëtare në Afganistan, gjeneralin Austin Scott Miller, në një vizitë të papritur në Kabul.
Ardhja e tij vjen në një çast që militantët talebanë i kanë intensifikuar sulmet e tyre ndaj forcave të sigurisë në të gjithë vendin, duke shkaktuar një numër të madh të viktimave ditore.
Vetëm sot u vranë të paktën 25 forca të sigurisë pasi militantët talebanë sulmuan një bazë ushtarake të fortifikuar në Afganistanin perëndimor.
Sulmet ndaj trupave ndërkombëtare nga forcat afgane janë rritur gjithashtu në javët e fundit. Të shtunën, një ushtar amerikan u vra dhe një tjetër u plagos në Afganistanin lindor.
/b.d
