SPAK, Struktura e Posaçme Anti Korrupsion ka regjistruar kallëzimin e Nisma ‘Thurje’ lidhur me zyrtarët e përfshirë në dhënien me koncesion të procesit të sterilizimit. Pritet që javën e ardhshme SPAK të marrë në pyetje personat e kallëzuar si dhe ata që kanë firmosur kontratën, përfshirë edhe kompaninë ftuese.
SPAK identifikon 12 personat që nga e hëna 20 janarit do të pyeten në lidhje me kontratën koncesionare të sterilizimit.
Burime nga SPAK bënë me dije për Report Tv se pas regjistrimit të këtij kallëzimi janë caktuar dy prokurorë të Njësisë së Korrupsionit në SPAK dhe kanë nisur veprimet konkrete.
Të njëjta burime sqaruan se fillimisht do të pyeten personat e kallëzuar nga nisma “Thurje”, ata që kanë firmosur kontratën Partneritet-Publik-Privat si dhe përfaqësuesit e kompanisë private përfituese e këtij partneriteti.
Më 23 dhjetor Nisma “Thurje” depozitoi pranë Prokurorisë së Posaçme kundër Korrupsionit dhe Krimit të Organizuar, një kallëzim penal për zyrtarët e përfshirë në procesin e dhënies me koncesion të procesit të sterilizimit të pajisjeve kirurgjikale. Përfaqësues të Nisma ‘Thurje’, Endri Shabani dhe Artan Koni kërkuan hetimin e zyrtarëve duke nisur nga ish-ministri i Shëndetësisë Ilir Beqja, të cilët sipas tyre kanë abuzuar me buxhetin e shtetit.
g.kosovari
