Mjeku Artan Koni, një prej personave që kallëzoi në prokurori për korrupsion koncesionin e sterilizimit dhe disa zyrtarë, ka folur për mediat pas dëshmisë së dhënë në Prokurorinë e Posaçme Anti Korrupsion.
Ai tha se është thirrur si një nga kallëzuesit për të dhënë detaje për çështjen e koncesionit që konsiderohet si korruptiv nga Nisma Thurje, subjekt që ka bërë edhe padinë.
“Sot prokuroria më thirri si një nga kallëzuesit më shumë për të marrë detaje si janë përllogaritjet si ekspert fushe dhe iu sqarova mënyrën si është bërë kjo llogari. Kemi dyshime se është koncesion korruptiv, mbetet ta vlerësojë prokuroria dhe cilët janë fajtorët nëse ka.
Një koncesion për të cilin paguajmë 17 mln euro në vit, ndërkohë që për një set kirurgjikal kosto është 2.4 euro. Kjo është baza që kemi ne se kemi të bëjmë me një koncesion korruptiv. Nuk kam prova të reja”, deklaroi Koni.
Pak ditë më parë mjeku Artan Koni dhe aktivisti Endri Shabani kërkuan në prokurori hetimin e ish-ministrit të Shëndetësisë Ilir Beqja, dhe ish-zyrtarëve të përfshirë.
Ata i akuzojnë se nëpërmjet kontratës koncensionare kanë abuzuar me buxhetin e shtetit. Për këtë kallëzim pritet të merren në pyetje edhe përfaqësues të Nismës Thurje.
g.kosovari
