Debate mes opozitës dhe maxhorancës për komisionin hetimor për koncesionet në Shëndetësi. Opozita kërkon shtyrjen e afateve, ndërsa maxhoranca deklaron se nuk ka një kërkesë të bazuar në ligj dhe se vetë opozita e ka sabotuar.
Ministri i Shtetit për Marrëdhëniet me parlamentin Taulant Balla tha se si parakusht ligjvënësi ka vendosur që në komision të bësh një vendim të ndërmjetëm. Ndërkohë kreu i grupit parlamentar të PD-së Gazment Bardhi deklaroi se nuk ka asnjë fjali në ligj për komisionet hetimore që kërkesa për zgjatjen e komisionit hetimor të bëhet me vendim të ndërmjetëm të komisionit.
Balla: Kërkesa e 7 deputetëve nuk përmbush asnjë parakusht. Që të zgjatet komisioni i ka dhënë kompetencën vetë komisionit ta bëjë zgjatjen. I ka dhënë Kuvendit vetëm kompetencën për ta ngritur. Si parakusht ligjvënësi ka vendosur që në komision të bësh një vendim të ndërmjetëm. Ka ndodhur dy herë dhe është zgjatur. Është vendosur me konsensus. Ky vendim nuk ka ndodhur, sot në orën 16:00 i mbaron mandati komisionit hetimor. Tani bëhet një teatër deri sa të vejë ora. Ju vetë sot e keni sabotuar me dëshirë. Këtu ishim para një jave, pse nuk erdhët. Pse nuk parashtruar një vendim të ndërmjetëm në komision? Nuk ka ndodhur. Rregullorja e Kuvendit, doni apo s’doni kemi një problem aty, neni 25 është neni më i shkurtër dhe natyrshëm duhet dhe prandaj do kishit bërë mirë të kishit ardhur te kom i posaçëm dje për të diskutuar dhe për nevojën që ka Kuvendi për të rregulluar gjithë kuadrin e vet të brendshëm sepse e vërteta është që kjo është rregullorja. Ju mund të hidheni përpjetë deri në 4 kur të mbyllet sepse Kuvendi nuk ka asnjë kompetencë ta bëjë këtë gjë sa kohë që ne nuk kemi para një vendim të ndërmjetëm. Të kishit ankimuar vendimin e djeshëm të Konferencës së Kryetarëve. Debati me ty për rregulloren e Kuvendit është një debat që nuk mund të bëhet me palë të barabarta.
Prandaj ose formuloni një kërkesë për të ankimuar vendimin e djeshëm të Konferencës së Kryetarëve dhe të shprehet salla edhe pse nuk ka bazë sepse në fund të fundit kërkesa e 7 deputetëve nuk bazohet asgjëkundi. Nuk kemi thënë në nenin 19 që 7 deputetët kanë të drejtë të kërkojnë zgjatjen e hetimit. Pak jurisprudencë e keni mësuar.
Bardhi: Meqë iu drejtove znj. Vokshi se nuk ka lidhje dhe s’do të bësh debat për rregulloren, në fakt të bësh debat me ty për ligjin këtu pastaj duhet të shembet godina. Ju sfidoj të gjeni një fjali për komisionet hetimore që kërkesa për zgjatjen e komisionit hetimor të bëhet me vendim të ndërmjetëm të komisionit. Nuk ka asnjë fjali në ligj në raport me këtë. Çdo kërkesë që vjen nga grupi nismëtar për kohëzgjatjen e punës së komisionit apo shtim të kohës merret në shqyrtim nga konferenca e kryetarëve dhe është detyrim i konferencës së kryetarëve ta sjellë për vendim në seancë. Vendimi që keni marrë dje nuk ankimohet askund.
Ti japin mundësi një javë komisionit të përfundojë planin e punës. Ju 40 ditë i penguat. Po kërkojmë të respektohet Kushtetuta. Është minimumi për bashkëjetesë.
