Në spitalin rajonal të Fierit do të hapet nesër kabineti i ri i kemioterapisë, ku mund të trajtohen të gjitha gratë e diagnostikuara me kancer të gjirit.
Lajmi u bë i ditur nga ministrja e Shëndetësisë, Ogerta Manastirliu, gjatë fjalës së saj në Kuvend.
Ministrja tha se “objektivi ynë madhor është rritja e aksesit, përmirësimi i cilësisë së shërbimeve ndaj jemi duke zgjeruar dhe vijuar në zgjerimin e shërbimeve afër vendbanimit”.
“Kabineti i ri i kemioterapisë në Fier do të hapet nesër, për të gjitha ato gra, të cilat duhet të vinin në Tiranë për të bërë ciklin e kemioterapisë. Nga nesër ato mund të trajtohen afër vendbanimit të tyre pranë kabinetit të ri, që do të hapet pranë spitalit rajonal të Fierit. Së bashku me kabinetet, të cilat po funksionojnë të hapura prej vitit 2015 në spitalet rajonale të Vlorës , Shkodrës, Vlorës , Elbasanit, Durrësit dhe Korçës, iu jepet mundësi grave që vuajnë nga kjo sëmundje të marrin shërbimin aty ku jetojnë”, theksoi Manastirliu.
Ministrja foli edhe për hapjen për herë të parë këtë muaj të njësisë së Senologjisë, e dyta në vend pas QSUT-së, në spitalin rajonal të Durrësit.
“Kjo njësi plotëson ciklin e trajtimit të grave duke filluar nga parandalimi, diagnostikimi, trajtimi i sëmundjes së tumorit të gjirit nga një ekip multidisiplinar që ofron shërbimin e integruar për patologjitë”, shtoi ajo.
Ministrja bëri të ditur gjithashtu se me instalimin e akselatorit të dytë linear në QSUT rreth 1200 pacientë në vit marrin shërbimin e radioterapisë në kushte dhe standarde bashkëkohore, duke përmirësuar cilësinë dhe saktësinë e trajtimit me teknika të reja që përdorin në botë.
“Padyshim investimet në aparatura do të vazhdojnë dhe ashtu siç kemi bërë këtë vit ne po zgjerojmë në mënyrë kapilare të gjitha investimet në aparatura, për sa i përket trajtimit të sëmundjeve kardiovaskulare dhe në diagnostikë”, tha ajo.
/b.d
