SPECIALE JAVANEWS/ Është pak e habitshme sesi deputeti i PD-së, Flamur Noka, i cili është edhe nënkryetar i komisionit të Sigurisë Kombëtare, ka arritur të marrë “certifikatën e sigurisë”, në kohën kur ka pranuar se ka marrë një ofertë zyrtare, për të qenë agjent i UDB-së, duke qëndruar në ish-Jugosllavi, në vitin 1991. Sipas deklaratave të tij, botuar nga “Tema”, para organeve zyrtare shqiptare, Noka thotë se ai i është përgjigjur interesimit të UDB-së për ngjarjet në Shqipëri, themelimin e PD-së, kush janë njerëzit që drejtojnë PD-në, kush i ka nxitur ngjarjet e Shkollës së Bashkuar dhe rrëzimin e Monumentit të Enver Hoxhës, si dhe për zhvillime në fshatin e tij të lindjes, Novosej. Ai thotë se është pyetur për zyrtarë që drejtonin sgurimin në fshatin e tij, për PD-në dhe pas kësaj është deportuar në Shqipëri.
Interesante është se Noka ka pranuar se pas gjithë këtyre akteve ka gisht PD-ja. Në deklaratën e tij, nuk thuhet, se ai nuk ka pranuar të punojë për UDB-në në Shqipëri. I gjithë ky episod mungon në vetëdeklarimin e tij në lidhje me “dekriminalizimin”. Kjo hedh jo pak hije dyshimi.
Ligji për informacionin “top secret”
Por ajo që bie në sy në gjithë këtë është fakti se megjithëse ky informacion është zyrtarë, Noka sërish ka arritur të marrë “certifikatën e sigurisë” për informacione “Top Secret”, gjë që hedh jo pak hije dyshimi dhe mbi seriozitetin mbi të cilin punojnë institucionet tona kombëtare në fushën e sigurisë, sidomos të informacionit. Ligji për personat që pajisen me “certifikatën e sigurisë”, në pamje të parë duket mjaft i rreptë. Ky ligj, sa i përket informacionit “tepër secret”, vendos rregulla strikte.
“DSIK-ja ka të drejtë t’u kërkojë informacion për verifikimin e pastërtisë së figurës Shërbimit Informativ të Shtetit, Shërbimit Informativ Ushtarak, Shërbimit të Kontrollit të Brendshëm, Policisë së Shtetit, organeve të drejtësisë, të financave dhe ministrive e institucioneve të tjera shtetërore, që i gjykon të nevojshme”, thuhet në ligjin në fjalë.
Por ajo që bie në sy në ligjin për dhënien e certifikatës së sigurisë është fakti se në nenin 5 pika c të ligjit thuhet se “DSIK-ja, në bazë të kërkesës dhe të dokumentacionit të paraqitur nga institucioni, kur i gjen të plota, u kërkon institucioneve të përcaktuara në shkronjën “ç” të pikës 1 verifikimin e pastërtisë, për një periudhë jo më pak se 10 vitet e fundit, ose, kur kjo periudhë është e pamjaftueshme, nga mosha 18 vjeç deri në moshën aktuale”. Rreshti i parafundit e bën objekt verifikimi Nokën që nga mosha 18 vjeç.
Shkeljet
Nga e gjithë kjo panoramë del qartë se ligji në kornizën e tij është mjaft i rreptë. Por po të kemi parasysh deklaratat me shkrim të Nokës, gjatë hetimit nga UDB dhe dhënies së informacionit të tij këtij shërbimi për gjërat që është pyetur, duket se institucioni që lëshon “certifikatën e sigurisë” ka qenë tepër dorëlëshuar. Çështja bëhet pak edhe më e komplikuar dhe përgjegjësia e këtij institucioni është e dukshme po të kemi parasysh se DSIK certifikon dhe ata individë që kalojnë nëpër duar informacione të NATO-s. Ka 2 elementë që peshojnë jo pak: 1. Noka nuk ka thënë të vërtetën në formularin për dekriminalizimin, në lidhje me ndalimin, marrjen në pyetje nga UDB, dhënien e informacionit këtij shërbimi, dhe më pas deportimin sërish në Shqipëri; 2. Lëshimi i “certifikatës së sigurisë” nga DSIK-ja ku ndërkohë deklarimet e tij janë kanë zyrtare dhe të firmosura në lidhje me UDB-në. Ligji është shkelur në të dyja rastet.
(javanews.al) Me. Ar
