Autoritetet kineze kanë konfirmuar shkarkimin dhe hapjen e hetimeve ndaj dy figurave kyçe të udhëheqjes ushtarake të vendit, në një zhvillim që hedh dritë mbi tensionet e brendshme në aparatin e pushtetit të Kinës.
Zhang Youxia, nënkryetar i Komisionit Qendror Ushtarak, dhe Liu Zhenli, shef i Departamentit të Shtabit të Përbashkët, janë larguar nga detyrat dhe janë vënë nën hetim për “shkelje të rënda disiplinore”, njoftuan burime zyrtare nga Pekini. Një formulim që, në praktikën politike kineze, përdoret shpesh për të mbuluar akuza për korrupsion apo shkelje politike.
Zbulime të publikuara nga Wall Street Journal sugjerojnë se Zhang Youxia dyshohet se ka zbuluar sekrete mbi programin bërthamor kinez ndaj Shteteve të Bashkuara, si edhe se ka pranuar shuma të mëdha parash për të favorizuar emërime dhe ngritje në gradë në ushtri. Këto pretendime nuk janë konfirmuar zyrtarisht nga autoritetet kineze.
Në një veprim të pazakontë, gazeta zyrtare e Ushtrisë Popullore Çlirimtare publikoi një artikull shpjegues mbi këtë çështje, duke akuzuar dy zyrtarët se kanë “minuar” autoritetin e presidentit Xi Jinping, kanë përkeqësuar korrupsionin brenda ushtrisë dhe kanë dëmtuar përgatitjet për “luftë reale”.
Sipas artikullit, hetimet tregojnë se “nuk ka tolerancë” ndaj korrupsionit dhe se Zhang dhe Liu “kanë tradhtuar besimin e Partisë dhe të ushtrisë”, duke dëmtuar sistemin e përgjegjësisë që përqendrohet te kryetari i Komisionit Qendror Ushtarak, post që mbahet nga vetë Xi Jinping.
Gjuha e ashpër e përdorur në publikimet zyrtare, e ngjashme me retorikën e Revolucionit Kulturor, ka nxitur spekulime mes analistëve për një moment dobësie politike të presidentit kinez. Aktualisht, nga Komisioni Qendror Ushtarak i emëruar në vitin 2022, raportohet se vetëm përgjegjësi i disiplinës, Zhang Shengmin, mbetet aktiv.
Disa vëzhgues kanë rikujtuar precedentë historikë, si rasti i Lin Biao-s në vitin 1971, një nga figurat më të afërta të Mao Ce Dunit, i akuzuar për tentativë grushti shteti dhe i vrarë gjatë arratisjes.
Mbetet e paqartë nëse bëhet fjalë për një komplot kundër Xi Jinping apo për një rast të rëndë tradhtie individuale. Në një sistem ku transparenca është e kufizuar, e vërteta pritet të mbetet e fshehur për një kohë të gjatë.
Ajo që duket e sigurt është se presidenti Xi Jinping po konsolidon gjithnjë e më shumë pushtetin në duart e tij, një zhvillim me pasoja të paparashikueshme për Kinën dhe stabilitetin rajonal.
