Reforma në drejtësi dhe ngritja e organeve të reja për të hetuar krimin e organizuar dhe korrupsionin në nivele të larta ka tmerruar të gjithë politikanët në vend. Një gjë të tillë e pohoi ditën e djeshme edhe avokati Spartak Ngjela. Në një reagim për gazetën “SOT”, avokati u shpreh se ngritja e SPAK ka vënë në alarm gjithë klasën politike në vend, duke veçuar këtu presidentin Ilir Meta, që sipas tij është më i tremburi.
Por duke iu referuar përparimit të reformës në drejtësi, Ngjela tha se SHBA është e vendosur për t’i shkuar deri në fund kësaj reforme, duke theksuar se Uashingtoni do të sjellë 35 ekspertë të FBI që SPAK dhe BKH të sjellë rezultate pozitive. Por avokati komentoi edhe nismën e mazhorancës për shkarkimin e Ilir Metës nga posti i presidentit. Sipas Ngjelës, Meta nuk ka asnjë shans t’i shpëtojë shkarkimit, duke theksuar se pas lënies së detyrës do të jetë pa imunitet dhe do të hetohet më lehtë. “SPAK punë ditësh do ngrihet me Prokurorinë e Posaçme dhe me Byronë Kombëtare të Hetimit, e cila sipas njoftimit amerikan do të sjellë 35 ekspertë të FBI. Pra gjendja po shkon drejt stabilizimit të luftës kundër krimit të organizuar dhe korrupsionit.
Tani ka filluar që të goditet edhe mafia e ndërtimit. Të gjithë politikanët do të kalojnë në kontroll të veçantë. Të gjithë politikanët i ka trembur reforma në drejtësi. SPAK koncepton fillimin e reformës në drejtësi dhe kjo gjë ka trembur të gjithë pushtetarët e korruptuar, pra kjo është njëra anë e medaljes së Metës. Ana tjetër e medaljes së presidentit është ajo që ka bërë, pra që ka shkelur dy herë Kushtetutën dhe që do ta pushojnë. Pushimi e çon drejt kontrollit të imtësishëm. Tani do shikojmë se si do procedohet me komisionin e hetimit për Metën, do vazhdojë të hetohet dhe ta votojë Parlamenti dhe të qërohet. Unë them se Parlamenti do e pushojë presidentin”, u shpreh Ngjela.
Dënime për abuzuesit e ndërtimeve
Më tej, avokati u shpreh se në “grackën” e reformës në drejtësi do të jenë edhe abuzuesit e ndërtimeve pa leje, të cilët përfshijnë përfaqësues të shtetit dhe ndërtuesit. Sipas Ngjelës, tashmë erdhi koha që hetimet e tyre të bëhen nga një prokurori e pavarur dhe e pandikuar nga politika. “Deklaratat e ambasadës amerikane janë një hap përpara i reformës në drejtësi dhe ata do e çojnë deri në fund. Por ka një lidhje logjike sepse në momentet kur Shqipëria është nën tension të goditjeve të tërmetit me 51 viktima, ata i shtojnë edhe këtë situatës. Madje filluan edhe arrestimet e të fajshmëve të viktimave. Janë bërë shumë ndërtime pa leje edhe nga shteti, por edhe nga ndërtuesit. Dhe tani prokuroria shqiptare nuk do kontrollohet më nga politika”, u shpreh avokat Spartak Ngjela në reagimin e tij për gazetën “SOT”.
Sulmet e Metës ndaj amerikanëve
Por pak kohë më parë në një reagim për gazetën, avokat Spartak Ngjela u shpreh se SHBA e ka të qartë çfarë do të vazhdojë të bëjë Shqipëria. Sipas tij, Meta ka shpërthyer në sulme ndaj amerikanëve pasi ka shthurje të mëdha mendore. “Sot, Departamenti Amerikan i Shtetit iu përgjigj me elokuencë Metës duke i thënë: Ti, zoti Meta, je antireformë. Por reforma do të vijojë se është jetike për Shqipërinë. Ky është thelbi i përgjigjes. Ndërsa, për atë të shtetit të ambasadorëve në vend të shtetit të së drejtës, që tha Meta dje, DASH i tha se, “kryesor është zbatimi i ligjit”. President më të paturpshëm se ky, nuk do t’i vijë më Shqipërisë. Edhe Sali Berisha e humbi toruan në luftën e tij me Uashingtonin në vitin 1997, por, të gjitha absurditetet nuk i tha botërisht si president, por në telefon me ta. Kurse Metën e kërcënon edhe penaliteti për shkelje të mëdha të ligjit, prandaj e ka kaq të madhe shthurjen mendore”, tha Ngjela pak ditë më parë.
