Namir Lapardhaja, e quan padyshim 2024-ën si vitin e SPAK. Sipas tij, Prokuroria e Posaçme ka goditur nivele të larta të politikës që në këto 34 vite nuk ishte menduar asnjëherë.
“Viti 2024 është viti i SPAK, kemi parë të ngjiten dhe të futen brenda dyerve të qelqta të SPAK njerëz të rëndësishëm të politikës që në këto 34 vite nuk ishte imagjinuar e as menduar ndonjëherë se do përballeshin më drejtësinë.
Kemi zhbërjen e një koncepti që drejtësia nuk është për nivele të larta të politikës, por për njerëzit e thjeshtë dhe të zakonshëm, gjë që u zhbë gjatë këtyre viteve dhe këtyre muajve.
Edhe vetë politika duhet të mësohet me këtë realitet të ri. SPAK po tregon se askush nuk është mbi ligjin”, tha Lapardhaja në Report Tv.
Lapardhaja nuk e sheh fituese opozitën në zgjedhjet parlamentare të 2025, duke thënë se PD e PL penalizohen me faktin që kanë lidhur fatet e tyre me fatin penal të Berishës.
Ai shtoi se edhe vetë deputetët e PD janë të vetëdijshëm që s’do fitojnë, por janë rreshtuar krah tij për të siguruar një karrige deputeti në zgjedhjet e ardhshme.
“Opozita nuk duhet të lidhë fatin me figura problematike që kanë problemet e tyre nga e shkuara dhe jo nga aktiviteti i tyre si opozitarë me drejtësinë. Në këtë kuptim mendoj se duke qenë se s’ka ditur të ndahet nga e shkuara. Opozita ka qenë e penalizuar qoftë nga fati i Berishës, qoftë nga fati i Metës.
Aksioni 3-vjecar i Berishës në krye të PD për ta zhbërë dhe për ta marrë atë ndër vete, mendoj se ka dekurajuar votën opozitare. Sot pavarësisht korrupsionit shumë të madh, goditjeve mjaft të mëdha që ka marrë mazhoranca, pakënaqësisë popullore, nuk ka shqiptar që mendon se kjo opozitë do fitojë qeverisjen.
Edhe vetë deputetë e Berishës e dinë një gjë të tillë, por kanë qenë të detyruar të rreshtohen pas Berishës për të pasur një karrige deputeti të sigurt, pavarësisht se çfarë ndodh më 11 maj”, tha ai.
