Shtyhet vendimi për ish-truprojën e ish-ministrit të Brendshëm, Saimir Tahiri, Hekuran Marku, në Gjykatën e Posaçme për mungesë të avokatit mbrojtës.
SPAK kërkoi për të pretencë, dënimin me 12 vite burg, teksa procesi është në fazë vendimi në Shkallën e Parë të GJKKO. Hekuran Marku u arrestua në Gjermani me kërkesë të Prokurorisë së Posaçme.
Emri i tij u shfaq në operacionin ndërkombëtar “Shpirti”, në të cilin u vendosën në pranga biznesmenë, prokurorë dhe zyrtarë të lartë të Policisë së Shtetit, të akuzuar si pjesëmarrës në veprimtaritë kriminale të drogës. Marku u vu në pranga në gusht të vitit 2021, ai ishte pjesë e grupit të shoqërimit të Saimir Tahirit, në kohën kur ishte në krye të Ministrisë së Brendshme, në vitet 2014, 2015 dhe 2016.
Në atë kohë, sipas SPAK, Marku bashkëpunoi me katër italianë dhe një bashkëkombas, Eltjon Bregun, në trafikimin e rreth 1 ton kanabis drejt Italisë me kolegun e tij Agustin Deda.
/s.f
