Menjëherë sapo Parlamenti i dha dritën jeshile, Prokuroria e Posaçme iu drejtua gjykatës me një kërkesë për caktimin e masës së sigurisë “arrest në burg” për ish-zv/Kryeministrin Arben Ahmetaj.
Mësohet se bashkë me kërkesën për arrestimin SPAK ka kërkuar edhe leje për kontrollin e banesave të tij.
Kërkesa e SPAK është marrë nga gjyqtari Erjon Bani, i cili do të duhet të shqyrtojë materialin hetimor të SPAK në një afat prej 48 orësh dhe më pas të dalë me një vendim.
Pas vendimit të gjykatës, nëse pranohet kërkesa e SPAK, pritet që policia të ushtrojë kontrolle në të gjitha banesat e Ahmetajt dhe të bëjë kërkimet për ta gjetur atë.
Ligjerisht procedura e kërkimit në territorin shqiptar te ish-ministrit do të marrë të paktën 2 javë kohë, deri në deklarimin e tij si të ikur. Vetëm pas këtij momenti, SPAK bën shpalljen e tij në kërkim ndërkombëtar.
Por avokatët e ish-zëvendëskryeministrit kanë zbuluar këtë të premte se klienti i tyre ndodhet në Angli. Ata e pohuan këtë edhe në një komunikim me Tv Klan.
Ish-zëvendëskryeministri Arben Ahmetaj është person nën hetim nga SPAK për akuzën e korrupsionit në 6 raste, fshehjes së pasurisë dhe pastrimit të parave.
Hetimi ndaj tij ishte derivim nga dosja e inceneratorit të Elbasanit dhe SPAK thotë se e ka kapur në korrupsion atë me dy biznesmenët e inceneratorëve, Klodian Zoto dhe Mirel Mërtiri.
/f.stafa
