Maturantët në të gjithë republikën do t’i nënshtrohen sot provimit të parë të Maturës Shtetërore, atij të gjuhës së huaj.
Ndërkohë mësohet se mbi 40 mijë maturantë do të nisin sot sfidën e parë dhe më të rëndësishmen për mbylljen e arsimit të tyre parauniversitar.
Testi për provimin e Anglishtes do të përmbajë 25 pyetje nga të cilat 13 do të jenë kërkesa me përgjigje me alternativa, të cilat do të vlerësohem me nga 1 pikë dhe 12 kërkesa të tjera janë me zhvillim dhe vlerësohen me 37 pikë.
MAS u ka bërë thirrje maturantëve që të mos kopjojnë pasi rrezikojnë pezullimin, ndërkohë ditën e djeshme ministrja e Arsimit, Mirela Karabina ka garantuar mësuesit dhe nxënësit se procesi do të monitorohet rreptësishtë.
“Maturanti paraqitet në qendrën e provimit, 1 orë e 30 minuta përpara fillimit të provimit. Në momentin e paraqitjes në mjediset e provimit, duhet të ketë dokumentin e identifikimit dhe mjetet e nevojshme si: laps, vizore, kompast, makinë të thjeshte llogaritëse. Kandidati plotëson testin me stilolaps me një ngjyre. Në pyetjet me alternativa, maturanti rrethon vetëm shkronjën përbri përgjigjes së saktë. Nëse rrethon më shumë se një alternativë, ose nuk rrethon asnjë alternativë, vlerësohet me 0 pike”, thuhet në Rregulloren e Ministrisë së Arsimit.
Vlerësimi
Do të jetë Agjencia Kombëtare e Provimeve që do të shpall skemën e vlerësimit te testit, jo më vonë se sa tri orë pas përfundimit të provimit të anglishtes. Vlerësimi i përgjigjeve të maturantit bëhet me pikë, të cilat ekuivalentohen në notë të përshkallëzuar./a.ç
