Në mbrëmje në ora 18:00 bëhet hapja zyrtare e edicionit të 18’të të Panairit të Librit, në ambientet e Pallatit të Rinisë
Mbi 100 shtëpi botuese nga Kosova, Shqipëria e Maqedonia do të shpërndajnë titujt e tyre në tri hapësira brenda Pallatit të Rinisë.
Rreth 1 mijë e 500 tituj të rinj, 12 aktivitete për përvjetorët e personaliteteve më të zëshme të librit, dhjetëra përurime librash, debate dhe darka, në të cilën ndahen çmime, përbëjnë pakon e edicionit të sivjetmë të ngjarjes kryesore të librit në vend.
Mysafirë të Panairit të Librit në Prishtinë sivjet janë shkrimtarja nga Parisi, Jennie Dorny, dhe shkrimtari e kineasti shqiptar, Roland Gjoza.
Organizatorët e panairit kanë bërë të ditur se tashmë përgatitjet kanë përfunduar dhe janë në pritje të botuesve.
Tradita e shënimit të përvjetorëve të personaliteteve të mëdha letrare shqiptare e botërore sivjet vazhdon me 450-vjetorin e lindjes së Pjetër Budit, 400-vjetorin e vdekjes së William Shakespeareit, 400-vjetorin e vdekjes së Miguel Cervantesit, 150-vjetorin e lindjes së Ndre Mjedës, 150-vjetorin e lindjes së Andon Zako Çajupit, 100-vjetorin e lindjes së Mbretëreshës Geraldinë, 100-vjetorin e lindjes së Jusuf Vrionit, 100-vjetorin e lindjes së Esad Mekulit.
Po ashtu, pjesë e aktiviteteve janë edhe ato që i dedikohen 90-vjetorit të Kasëm Trebeshinës, 80-vjetorit të lindjes së Ismail Kadaresë, 80-vjetorit të lindjes së Rexhep Qosjes dhe 80-vjetorit të lindjes së Adem Demaçit.
Për çdo vit, Panairi i Librit në Prishtinë sjell edhe mysafirë. Shkrimtarja amerikane që jeton në Paris, Jennie Dorny, do të jetë pjesë e këtij edicioni për të ndarë me vizitorët eksperiencën e saj në fushën e librit. Libri i saj i parë titullohet “Gambling Nova” dhe është shkruar më 1999.
Dorny është autore edhe e “Eridan” (2002) dhe “When Cupid Loses His Head” (2007). E Roland, që jeton në ShBA, vitin e kaluar me librin e tij “Zogjtë e Hiçkokut” qe shpallur autor i vitit nga Shoqata e Botuesve e Kosovës në çmimet që ndahen në kuadër të panairit.
Për çdo vit, në darkën tradicionale organizatorët nderojnë librat më të mirë në prozë, poezi, kritikë, përkthime letrare, projektim kapital sikurse edhe shpallin shkrimtarin e vitit të letërsisë shqipe, atë të letërsisë së huaj dhe standin më të vizituar.
Panairi i 18-të do të mbahet nga 7-12 qershor 2016 në ambientet e Pallatit të Rinisë, organizuar nga Shoqata e Botuesve të Kosovës, përgatiti Gazeta “Express”. (b.an)
