Sot në Mitrovicë do të fillojnë punimet për heqjen e barrikadës mbi lumin Ibër dhe revitalizimin e kësaj pune. Ministrja për Dialog, Edita Tahiri dje gjatë ditës ka njoftuar se punimet mbi lumin Ibër do të kryhen nga një kompani e kontraktuar nga Bashkimi Evropian.
Për revitalizimin e urës ishte vendosur në Marrëveshjen e Brukselit, e arritur më 25 gusht të vitit 2015, shkruan Gazeta Express.“Ura e Mitrovicës po lirohet pas gjashtëmbëdhjetë vjetësh që nga përfundimi i luftës dhe se Qeveria e Kosovës vlerëson lartë angazhimin e Bashkimit Evropian për zbatimin e kësaj marrëveshje e cila do të lehtësoj jetën e qytetarëve në atë pjesë të vendit duke kontribuar në normalizimin e komunikimit dhe bashkëpunimit mes qytetarëve dhe gjithë komuniteteve”, theksoi ministrja Tahiri.
Më 18 qershor 2014, serbët mbollën pisha dhe i vendosën mbi urën e lumit Ibër. Këtë gjë ata e quajtën “Parku i Paqes”. Një ditë më herët ishin hequr gurët që qëndronin si barrikadë mbi këtë urë të cilat simbolizonin ndarjen e qytetit të Mitrovicës. (b.an)