Afati i fundit i vendosur nga KQZ-ja, për publikimin e listave të deputetëve nga partitë garuese të 25 prillit, që përkon me mesnatën e kësaj të hëne, ka vendosur në lëvizje partitë e vendit.
I veshur me një kostum blu të errët dhe me një bluzë jeshile kreu i qeverisë mban në fytyrë maskën e personalizuar të betejës anti-COVID19, dhe ecën drejt hyrjes së Partisë Socialiste.
Partia Socialiste, ende nuk ka prezantuar kandidatët e saj në të gjitha qarqet. Mesditën e sotme kryeministri Edi Rama ka mbërritur në selinë rozë, ndërsa në ambientet e jashtme të saj, është duke u montuar një skenë lëvizëse, ku do të bëhet dhe prezantimi i kandidatëve.
Rreth orës 19:00 pritet që kryeministri Edi Rama të ketë një komunikim me gazetarët, ndërsa në orën 20:00, drejtuesit politikë të qarqeve, njëri pas tjetrit do të prezantojnë kandidatët për deputet për PS në të gjithë Shqipërinë. Partia Socialiste duket se ka një strategji politike për të maksimalizuar votën.
Drejtuesit e qarqeve në të gjithë vendin, nuk pritet të jenë pjesë e listave të sigurta, por në kufirin e mandateve që PS synon të marrë.
Kryeministri Rama, pritet të kandidojë në dy qarqe, Vlorë e Durrës dhe në të dyja, do të pozicionohet në vendin e tetë në listat emërore. Një strategji të tillë, Partia Socialiste e ndoqi në zgjedhjet e vitit 2017, ku kryeparlamentari Gramoz Ruçi, u vendos i 9 në listë në qarkun e Fierit dhe PS në këtë qark, siguroi 10 mandate deputetësh.
Sakaq, kujtojmë se gjatë ditës dy parti kanë dorëzuar në KQZ listën e kandidatëve. Ato janë, Lëvizja për Ndryshim e ish-parlamentares Jozofina Topalli dhe Lëvizja Socialiste për Integrim, e kryesuar nga Monika Kryemadhi.
g.kosovari
