Gjetjet e javës së fundit, nga të dhënat e mbledhura në terren nga ekipi i Datacentrum, thonë se pavarësisht besimit maksimal tek SPAK dhe drejtësia, për qytetarët shqiptarë, korrupsioni në vend vazhdon të jetë në nivele shumë të larta.
Në analizën e të dhënave të fundit mbi perceptimin e korrupsionit në vendin tonë, rezulton se të rinjtë janë grupmosha që perceptojnë më pak korrupsion në vend dhe në qeverisje, se sa grupmoshat e tjera.
Pavarësisht se në rezultatet e sondazhit të fundit, shifrat e perceptimit të korrupsionit janë në nivele të larta, me 82.7 %, në analizën e këtyre të dhënave sipas grupmoshave, të rinjtë kanë përqindjen më të ulët me 10 % më pak se grupmoshat e tjera, më të mëdha.
Tek 18-24 vjeçarët perceptimi për korrupsionin është 70,6 %, dhe rritet menjëherë ndjeshëm tek 25-34 vjeçarët me 84.2 %, arrin nivelin maksimal tek 45-54 vjeçarët me 87.4 % dhe mban pak a shumë të njëjtin trend edhe tek grupmoshat më të rritura, 55-64 vjeçarët apo 65-75 vjeçarët.
Ky trend i grupmoshave më të reja vihet re pothuaj në të gjitha pyetjet e bëra nga Barometri. Psh: Kur pyeten; “Krahasuar me 5 vite më parë korrupsioni në Shqipëri është ulur apo rritur”, rezulton se tek ata që mendojnë që është ulur, përqindjen më të lartë e zënë 18-24 vjeçarët.
Kështu 36.8% e atyre që mendojnë se korrupsioni në Shqipëri është ulur janë pikërisht më të rinjtë, ndërsa grupmoshat e tjera më të rritura, janë shumë më pak në përqindjen e atyre që mendojnë se korrupsioni është ulur.
I njëjti trend vërtetohet edhe kur i pyet qytetarët për eksperiencën personale krahasar me 5 vite më parë./m.j
