Shqiptarët e mbështesin fuqimisht reformën në drejtësi. 91 % e të intervistuarve ose e mbështesin “plotësisht” (67%) ose “deri diku” (27%) nevojën për një reformë të tillë. Sipas IDRA-s, niveli i mbështetjes ndryshon në varësi të nivelit të informacionit të qytetarëve.
Instituti për Kërkime dhe Alternativa Zhvillimi (IDRA) ka kryer një sondazh, duke kryer 1000 intervista ballë për ballë, bazuar në një kampion përfaqësues kombëtar me qytetarë të moshës mbi 18 vjeç.
Nga sondazhi i kryer në dy muajt e parë të këtij viti, rezultoi se 91 % e të intervistuarve e mbështesin nevojën për një reformë të tillë. Niveli i mbështetjes megjithatë ndryshon në varësi të nivelit të informacionit të qytetarëve.
Sondazhi tregoi se qytetarët shqiptarë besojnë se “gjykatësit dhe prokurorët” janë kategoritë më pak të interesuara për reformën, ndërsa komuniteti ndërkombëtar është më shumë i interesuar krahasuar me secilin prej aktorëve vendas. Qytetarët, gjithashtu besojnë se institucione të ndryshme duhet të bëhen gjerësisht pjesë e procesit të miratimit të reformës raporton Oranews.
Sondazhi tregoi se shumica e qytetarëve janë optimistë për shanset që ka reforma në drejtësi për tu miratuar nga parlamenti brenda vitit 2016. Megjithatë, ata mendojnë se do të ketë grupe, organizata ose individë të cilët do të përpiqen ta pengojnë miratimin e kësaj reforme në parlament.
Edhe pse optimistë për “miratimin” e reformës, qytetarët shfaqen deri diku të kujdesshëm kur pyeten nëse reforma do të zbatohet me sukses. Ndjesitë e qytetarëve lidhen me faktin se edhe pse bien dakord që reforma do të “luftonte pandëshkueshmërinë” dhe do të “rriste efikasitetin dhe profesionalizmin e gjykatave, ata gjithashtu mendojnë se reforma mund të jetë “rezultat i negociatave politike të cilat mund të ndikonin negativisht suksesin e saj ose që “njerëzit që janë pjesë e sistemit gjyqësor janë të korruptuar, dhe si rrjedhojë ndryshimi i sistemit nuk do të garantonte përmirësimin e tij”.
