Ministri i Mbrojtjes Niko Peleshi bëri një rezyme të situatës me përmbytjet në vend duke u shprehur optimist pasi reshjet kanë pushuar dhe sipas tij s’ka asnjë familje të kërcënuar nga uji.
Megjithatë Peleshi shprehet në intervistën për “News 24” se “bashkëpunimi me kryebashkiaken e Shkodrës nuk është në nivelin që do të donim të ishte”.
“Aty ku një bashki nuk funksionon siç duhet kompensohet me prefektët tanë”, u shpreh Peleshi, ndërsa shtoi se nuk është takuar me Voltana Ademin, ndonëse do të preferonte të takohej. “Mbase ka pasur angazhime të tjera të rëndësishme!”, ironizoi ai.
“Në HEC-in e Fierzës 10 metra rezervë. Nuk ka shkarkime në Vaun e Dejës, për shkak të reshjeve në ditët në vazhdim ne parashikojmë që nuk do të ndodhë më e keqja, përmbytja e NënShkodrës dhe Bushatit. Jemi në gatishmëri të plotë. FA janë në gatishmëri të shtuar që prej dy ditësh, ne kemi në territor edhe mjete edhe forca, kanë evakuuar tre familje në Lezhë dhe disa në Shkodër. Në këto momente s’ka asnjë familje të kërcënuar apo pa akses. Kemi lajme shumë të mira nga Lezha”, tha ministri i Mbrojtjes.
“Reshjet kanë pushuar dhe kanalet kulluese kanë funksionuar. Ka një dëmtim rruge, prefekti më ka siguruar që i ka marrë masat dhe do të rehabilitohet shpejt. Niveli i ujit ka rënë ndjeshëm sot. Kemi disa akse ku ka dëmtime por forcat tona janë prezentë për rehabilitimin e tyre. Në Obot, kemi lënë në dispozicion mjete të rënda për të siguruar aksesin me fshatin. Kjo situatë është minore në krahasim me të shkuarën. Ka rënë niveli në urën e Mifolit dhe në Memaliaj, para një ore ishte 4 metra. Reshjet e shiut do të rikthehen duke filluar nga sot pasdite. Parashikoj që s’do të kemi emergjenca apo rrezikime të jetëve të njerëzve”, u shpreh ai.
g.kosovari
