Skënderbeu do të luajë më i shpenguar se Beshiktashi, deklaroi dje trajneri i kampionëve të Shqipërisë për ndeshjen e sotme në Stamboll. Korçarët do të luajnë ndeshjen e pestë në Grupin H të Europa League, duke marrë zemër nga fitorja 3-0 në takimin e fundit, përballë Sportingut.
”Beshiktashi është ekip i fortë dhe i duhet të ndodhet në një vend më të mirë në grup”, tha Josa në konferencën për shtyp para ndeshjes.
“Fitorja me Sportig Lisbonën ka hapur një rrugë para nesh. E rëndësishme është përpjekja që do të reflektojnë lojtarët në ndeshjen e sotme. Qëllimi ynë është të marrim rezultate të mira në grup. Për këtë arsye nuk ndihemi nën presion. Mendoj se kundër Beshiktashit do të luajmë më lirshëm”.
“Beshiktashi ka lojtarë shumë të mirë. Ka një ekip që organizohet shpejt dhe që përpiqet të zotërojë topin. Ndër të tjera ne do të luajmë edhe para një tifozerie të mirë. Për këtë jemi shumë të lumtur. Mendoj se futbollistët në këtë situatë mund të prezantojnë një lojë më të mirë”, shtoi trajneri i Skënderbeut.
Ndeshjen mes Skënderbeut dhe Beshiktashit do ta gjykojë Pawel Gil nga Polonia.
