Skënderbeu i ka të gjitha mundësitë për të përsëritur sezonin e kaluar në Evropë, ku doli në play-off në Champions League dhe luajti në grupet e Europa League. Ecuria e gjatë në Evropë, me kalime raundesh dhe marrje pikësh e kanë rritur koeficentin e korçarëve, të cilët pritet të jenë në vazon e parë në shortin e Champions League për sezonin e ardhshëm. Disa kampionate nuk kanë përfunduar ende, por qenia në vazon e parë duket e sigurt për skuadrën e Mirel Josës, me koeficient 7.825, sipas asaj që shkruan Panorama Sport.
Në vazon e dytë do të jenë skuadra krejtësisht të përballueshme në letër, si Crusaders (që Skënderbeu e eliminoi vjet), Liepaja, Mladost Podgorica, Dundalk, kampionia e Moldavisë dhe e Luksemburgut.
Në raundin pasaradhës duhet një dozë më e madhe fati, pasi bashkohen skuadra të forta si Olimpiakosi e Viktoria Plzen.
Vjet Skënderbeu u eliminua në play-off nga Dinamo Zagreb, me të cilën tani gjendet në vazon e parë, duke shmangur përballjen. Sipas formatit të viteve të fundit, skuadrat kampione ndeshen vetëm me kampione.
D.I.
