Partizani pëson humbjen e parë pas 17 javësh dhe lëshon kreun për Skënderbeun që fitoi përballë të kuqve me rezultatin minimal 1-0 në një ndeshje të tensionuar.
90’ e zhvilluara në Korçë ishin të mbushura me gjithçka, tension, përplasje në tribunë dhe në fushë, shumë kartona të verdhë, një të kuq, raste pa fund për gol, por në fund triumfoi eksperienca e Skënderbeut, që duket se do të ngrejë kurorën e kampionit të dimrit edhe këtë edicion në kampionatin shqiptar.
Vendasit dominuan ndeshjen duke kaluar në avantazh që në minutën e 12 me një super gol të realizuar me kokë nga nigeriani Olainka.
Goli erdhi nga një aksion i shpejtë nga e djathta, Progni merr një top nga mesfusha, kroson saktë në zonë për sulmuesin që kërcen më shumë se mbrojtësit e kuq duke e ndalur topin në rrjetë.
Partizani tentoi të barazojnë disa herë, por lojtarët nuk u treguan të saktë para portës. Rastin më të mirë për të barazuar e kishte serbi Racic në minutën, i cili pas një pasimi të saktë doli i vetëm përballë Shehit, por portieri i korçarëve bën mrekullinë duke evituar një gol të sigurt.
Sfida ka pasur mjaft tension jo vetëm në fushë, por edhe në tribunë, pasi tifozët e Partizanit kanë thyer disa stola në stadium dhe kanë hedhur fishekëzjarrë, pasi arbitri nuk akordoi një penallti, e cila u pretendua nga Racic në të 37′. Situata është mbajtur nën kontroll nga forcat e shumta të policisë.
Provokimet mes tifozerive erdhën pa filluar ndeshja pas disa banderolave nga të kuqtë, që sollën kundërpërgjigjen e ‘Ujqërve të Dëborës’.
