EKSKLUZIVE/ Partia Demokratike po përpiqet të hartojë me shpejtësi një projektligj për armët. Ky projektligj duket se më shumë është një skenar rezervë, në lidhje me thirrjet e Berishës për armatosje të popullit. Burime të besueshme brenda PD-së bën të ditur për Javanews, se disa juristë brenda partisë janë duke u përpjekur të formulojnë një projektligj për pajisjen e popullsisë me armë sipas modelit amerikan.
Dhe kjo tentohet megjithëse cilido shqiptar e kujton tragjedinë që shkaktuan 1 milion armë në duart e popullates pas vitit 1997!
Në këtë projektligj kërkohet të sanksionohet e drejta për blerjen e armëve nga persona që mbushin moshën mbi 21 vjeç dhe që nuk kanë precedent penal. Ky projektligj parashikon që armët e blera duhen mbajtur në shtëpi dhe ndalohet mbajtja e tyre jashtë banesës. Kjo është në vija të përgjithshme përmbajtja e projektligjit i cili më shumë duket si një tentativë për “legalizimin” e armëve të shumë shqiptarëve që i mbajnë nëpër shtëpi, biznese apo që ushtrojnë veprimtari me karakter fitimprurës.
Por projektligji në fjalë më shumë se një përpjekje për të “legalizuar” armët, duket se është një përpjekje juridike për të justifikuar thirrjet e Berishës për armatosje të popullatës. Një thirrje e cila bie ndesh me praktikat ligjore në Europë, ku kërkohet të vendosen kufizime të rrepta për pajisjen e popullatës me armë.
Hartimi i një projektligji për pajisjen e popullatës me armë u artikulua në Kuvend edhe nga deputetë të PD-së. Më shumë se një nismë ligjore, deklaratat e tyre u komentuan si përpjekje për të justifikuar Berishën për thirrjet e tij për armatosjen e popullatës. Nga ana tjetër hartimi i disa pikave të projektligjit nga PD për armatosjen e popullatës, më shumë se një nisëm reale ligjore, duket se është një alibi. Kjo për faktin se nisma është e dështuar që në pikënisje, pasi përpjekja për anëtarësim në BE, do të krijonte përplasje të fortë me Brukselin në këtë pikë. Do të ishim i vetmi vend që shkon me armë të ligjëruara në Bashkimin Europian. Nga ana tjetër, Kushtetuta përcakton qartë se cilët janë institucionet, të cilave u lejohet të mbajnë armë. Ndërsa Kodi Penal e konsideron armëmbajtjen një vepër Penale.
Por edhe sikur të mos mjaftonin këto, pajisja me armë e popullatës, nuk ka asnjë lidhje me bazën ligjore dhe praktikën amerikane në këtë drejtim.
Kushtet në të cilat u ligjërua në SHBA mbajtja e armëve, kishin të bënin me një kontekst historik i cili nuk ka asnjë lidhje me realitetet e sotme. Është pikërisht ligji për armët ai që sot kundërshtohet ashpër në SHBA, pasi është përgjegjës për një sërë masakrash në Amerikë.
Është e qartë se hartimi i një projektligji të tillë është më shumë një “flluskë sapuni”, pasi jo vetëm që nuk ka asnjë shans që të miratohet në Kuvend, por nga ana tjetër një ligj i tillë nuk ka asnjë lidhje me botën e qytetëruar ku duam të përfshihemi. Kjo e bën qartazi të duket se një projektligj i tillë më shumë po hartohet për alibi. Qeveritë ndërrohet me votë. Dhe për këtë PD duhet të punojë shumë, pasi qytetarët janë dyfish më të pakënaqur prej PD-së sesa me qeverinë, e cila sa vjen e po krijon më shumë pakënaqësi për mënyrën sesi po qeveris.
Armando Meta
