Pas raportit sekret të Këshillit të Lartë të Shtetit të publikuar pak ditë më parë nga Shqiptarja.com për skandalin në thesarin e Bankës së Shqipërisë ku shuma e vjedhur nuk ishte 713 mln lekë, por 21 milionë euro ka reaguar Kryetari i Komisionit të Ekonomisë.
Erjon Braçe deklaron se nuk ka marrë asnjë raport por njofton se në shtator do të thërrasë për raportim Guvernatorin Gent Sejko dhe kreun e KLSH, Leskaj, ndërsa do të vendosë në dijeni prokurorinë për abuzimet e pretenduara.
“Unë në cilësinë e kryetarit të komisionit të Ekonomisë në Kuvend por edhe komisioni, nuk kam marrë kurrë nga KLSH një raport të tillë apo me përmbajtje të tille.
Por as KLSH, institucion i cili, në bazë të ligjit ka të drejtën të njoftoje apo kërkojë seancë të posacme në komision për një raport kontrolli lidhur me cështje të ndjeshme, nuk e ka kërkuar një gjë të tillë për këtë cështje konkrete në komision.
Nisur nga sa me sipër, po u bëj me dije se, do i propozoj komisionit që në javën e parë të shtatorit, kryetari i KLSH dhe Guvernatori aktual i Bankës së Shqipërisë të jenë në një seancë të posacme në komisionin e Ekonomisë për këtë raport, problematikën, vendimmarrjen në atë periudhë të Këshillit Mbikëqyrës dhe Guvernatorit, vënien në dijeni të prokurorisë për abuzimet e pretenduara nga KLSH”shkruan Braçe.
Edhe Guvernatori i Bankës së Shqipërisë, Gent Sejko mohoi të ketë marrë një raport sekret nga KLSH për shumën e vjedhur në thesarin e shtetit.
Por, në datë 3 gusht Shqiptarja.com publikoi një raport sekret të Kontrollit të Lartë të Shtetit të mbërritur në Prokurorinë e Përgjithshme dhe 5 institucione të tjera, hedh dritë mbi megaskandalin e vjedhjes së parave në Thesarin e Bankës së Shqipërisë.
Raporti hedh dritë mbi shifrën e saktë të vjedhjes, ku KLSH ka zbuluar se nuk bëhet fjalë për shifrën prej 713 milionë lekë të reja, siç deklaroi ish-guvernatori Fullani, por për 2.9 miliard lekë, e përkthyer kjo në 21 milion euro që mungonin në thesarin e Bankës së Shqipërisë.
Kjo sasi lekësh nuk është vjedhur nga një person i vetëm por siç thonë audituesit në raport, në këtë skemë janë implikuar disa zyrtarë të bankës dhe drejtues të Bankave të Nivelit të Dytë, duke dyshuar se kanë përdorur dokumentacion false në procesin e dorëzimit të lekëve për shkatërrim.
Kjo shifër është mbajtur sekret, me qëllimin e vetëm për të mos krijuar panik në tregun bankar, pasi publikimi i skemës së kësaj megavjedhje parashikohej të sillte në atë periudhë, tërheqjen e depozitave nga qytetarët dhe prishjen e ekulibrit bankar.
Për shifrën e sipërcituar mësohet të ketë pasur dijeni dhe zyrtarë të FMN. Ky raport vijon të qëndrojë në Prokurorinë e Përgjithshme dhe se kjo e fundit asnjëherë nuk ka hetuar në këtë drejtim.
