Të dhënat e OSBE-së për kultivimin e kanabisit në Shqipëri nxjerrin zbuluar një prej aferave më të mëdha të qeverisë së kaluar. Ditën e djeshme, e vendosur përballë përbaltjes së përditshme të organizmave europiane nga ana e Partisë Demokratike, OSBE reagoi duke postuar një stastikë, ku shkruhej se në vitin 2013, u kultivuan mbi 1 mijë tonë kanabis, me vlerë tregu prej 2 miliardë eurosh. Këto para, siç kanë thënë më parë edhe partnerët ndërkombëtarë, janë përdorur për të financuar në mënyrë të paligjshme fushatën zgjedhore të PD-së në vitin 2013. Me 528 mijë vota të grumbulluara nga PD në zgjedhjet e mbajtura përpara katër vitesh, një matematikë e thjeshtë nxjerr se demokratët investuan 4 mijë euro, për çdo votë të fituar.
Presidenti Trump, i cili grumbulloi rreth 600 milionë dollarë në fushatën e tij dhe që pati një raport prej 10 dollarësh të shpenzuar për çdo votë të fituar, duket një varfanjak në krahasim me buxhetin e PD-së për çdo votë të fituar.Deklarata e OSBE-së nxjerr zbuluar edhe një të vërtetë tjetër, pasi në shifrat e publikuara ajo shkruan se sasia e drogës së sekuestruar në 2016-n, është e barazvlefshme me 1 mijë tonë, pra po aq para sa siguroi kultivimi i saj në 2013-n (pra 2 miliardë euro të hequra nga duart e krimit). Ndërsa njeh nevojën për të luftuar ende këtë fenomen, OSBE e konsideroi luftën e qeverisë në luftën kundër kultivimit të kanabisit si një “sukses i madh”.
