E treta e vërteta. Kjo ka vlejtur për Komionin e Etikës pranë FSHF-së, që të merrte një vendim në lidhje me ndeshjen Tërbuni-Bylis 4-2, e denoncuar si e trukuar nga mediat, por, nga sa rezulton edhe dënimi, një gjë të tillë e kanë konfirmuar edhe zyrtarët e ndeshjes. Ndryshe nga sa pritej, që skuadrave t’u hiqeshin pikë nga klasifikimi, kjo nuk ka ndodhur. I çuditshëm është fakti se paracaktimi i rezultatit të kësaj ndeshjeje është pranuar nga Komisioni i Etikës, por ai ka lënë në fuqi fitoren e pukjanëve.
Pra, 3 pikët e këtij ballafaqimi vlejnë për klasifikimin dhe Etikën, edhe pse ato kanë qenë të paracaktuara. Kuptohet, i paracaktuar rezulton të jetë rezultati, në rastin më të mirë, në funksion të luajtjes në forma e kombinime të ndryshme në kompanitë e basteve. Lojtarë nga të dyja skuadrat, nga Tërbuni dhe Bylis, janë shpallur fajtorë për komplotim të rezultatit dhe janë dënuar me nga 6 muaj pezullim nga aktiviteti. Ja dhe vendimi i plotë i Komisionit të Etikës pranë FSHF-së: “Komisioni i Etikës pranë Federatës Shqiptare të Futbollit, i mbledhur sot, me datë 5 dhjetor 2015, pasi u njoh nga materialet e paraqitura nga Sekretariati Teknik dhe raportet e ardhura nga UEFA, i diskutoi çështjet në tërësi, vendosi:
1.Lojtarët e Tërbunit, Vilson Lila dhe Klodian Sulollari, për komplotim në influencimin e rezultatit të ndeshjes Tërbuni-Bylis 4-2, të datës 18.11.2015, në kundërshtim me etikën sportive, dënohen secili me nga 6 muaj pezullim nga aktiviteti.
2.Lojtarët e Bylisit, Kushtrim Mushica, Elton Basriu, Mariglen Shoshi dhe Ahmet Haliti, për komplotim në influencimin të rezultatit të ndeshjes Tërbuni-Bylis 4-2, të datës 18.11.2015, në kundërshtim me etikën sportive, dënohen secili me nga 6 muaj pezullim nga aktiviteti.” Të gjitha këto dënime, sipas Etikës, bazohen në nenin 68/1 të Kodit të Drejtësisë Sportive./Telesport
