Skandali që ka tronditur Partinë Demokrate e që po shkakton dorëheqjen e kreut të Komitetit Drejtues Debbie Wassermann Schulz, ka marrë në orët e fundit përmasat e një Lufte të vogël të Ftohtë. Përfaqësues nga kampi demokrat janë shprehur në mediat amerikane se emailet e publikuara nga Wikileaks, u janë dorëzuar njerëzve të Assange nga shërbimet ruse.
Në mesazhet që Wikileaks ka botuar, shihet qartë se Komiteti Drejtues i Partisë Demokrate, ka favorizuar Hillari Klintonin, duke u përpjekur të dëmtojë Bernie Sandersin. Në mesazhet e botuara, ftohen mediat amerikane që t’i bëjnë pyetje të sikletshme Sandersit, si për shembull rreth faktit nëse beson ose jo në Zot.
Pas skandalit të emaileve të kohës kur ishte Sekretare Shteti, ky është i dyti në rradhë për Hillari Klintonin. Sërish një skandal me mesazhet elektronike. Në fakt nuk është e rastit që pikërisht në këto orë, për shkak të këtyre problemeve, Klinton e sheh veten pas në sondazhe, përballë Donald Trumpit. E gjitha kjo, në prag të Konventës Demokrate të Filadelfias.
