Nuk ka fund skandali i basteve sportive në Turqi. Hetimet kanë sjellë dënime të tjera, ndaj futbollistëve dhe arbitrave. Çështja, e cila shpërtheu gjatë vjeshtës, ka përfshirë lojtarë, gjyqtarë dhe drejtues klubesh, duke tronditur futbollin turk.
Komisioni Disiplinor i Federatës Turke ka dënuar gjithsej 224 futbollistë dhe 24 arbitra. Rreth një muaj më parë, mbi një mijë lojtarë u referuan në organet e drejtësisë, së bashku me disa arbitra dhe zyrtarë.
Mes emrave të përfshirë kishte edhe futbollistë të njohur, si Eren Elmali i Galatasarayt, i cili u përjashtua edhe nga kombëtarja turke. Sipas të dhënave zyrtare, 197 nga 224 futbollistët e dënuar janë amatorë. Ndërkohë, pesë nga 24 arbitrat e ndëshkuar gjykojnë në kategorinë e parë të futbollit turk.
Dënimet variojnë nga 45 ditë deri në një vit pezullim nga aktivitetet sportive. Hetimet për këtë çështje vijojnë dhe pritet të zgjasin edhe në periudhën në vazhdim. Federata ka bërë të ditur se procesi disiplinor është zhvilluar sipas rregullores përkatëse.
Skandali konsiderohet një nga më të mëdhenjtë në historinë e futbollit turk. Autoritetet kanë theksuar se rastet do të trajtohen individualisht.
