Dhjetë ditë pasi Ardian Bitraj, rrëfeu supervjedhjen e parave në Bankën e Shqipërisë, ky institucion ka marrë masat e menjëhershme, duke blerë dy kasaforta. Pikërisht këto kasaforta që duhet të ekzistonin në ambientet e Thesarit të Shtetit qysh prej vitit 2009, ku do të mbylleshin çelësat dublikatë të Arkës Stok dhe Arkës në Veprim, janë blerë nga banka, 10 ditë pas plasjes së skandalit të vjedhjes së 713 milion lekë të vjetra. Pas një kërkesë zyrtare nga Departamenti i Administrimit dhe më konkretisht nga drejtori Agron Skënderaga, i cili ka miratur kërkesën e sektorit teknik për blerjen e dy kasafortave me një çmim deri në 3 milion lekë të vjetra. Kërkesa është përpiluar dhe firmosur në 31 korrik 2014, ndërkohë që në 21 korrik vetë ish-përgjegjësi Ardian Bitraj tregoi skemën e vjdhjes së parave,duke nënvizuar se çelësat e dyerve i mbante gjithmonë ai, për shkak se nuk kishte një kasafortë të veçantë për mbylljen e çelësave që hapnin kasafortën e dy arkave stok dhe asaj në veprim. Dy kasafortat janë blerë me një çmim prej 990 mijë lek të vjetra secila, ndërkohë që janë tërhequr nga Departamenti i Administrimit në datën 31 korrik 2014 nga dy punonjësit e bankës të arrestuar Petrit Ramohitaj dhe Lavdim Canaj.
Fotografitë e kutive
Nga hetimi i njësisë hetimore Task-Forcë,është evidentuar se Bitraj ka mbushur me topa spangoje pjesën më të madhe të kutive të boshatisura. Një fakt i tillë është konstatuar me tabela fotografike ku 8 arkat me para të vjedhura nga Ardian Bitraj, pasi janë gjendur janë fotografuar. Oficerë të prokurorisë dhe një ekspert i policisë kriminale kanë mundur të hyjnë brenda në ambientet e Thesarit duke kryer fotografimin e asaj që Bitraj, kishte mundur të kryente për rreth 4 vite me rradhë, duke mos u zbuluar nga eprorët e tij dhe inventarizuesit e BSH. Fotografitë tregojnë se si nga arkat janë hequr shuma të konsiderueshme kartëmonedhash me prerje 5000 lekë dhe në vend të tyre janë vendosur libra dhe topa spango. Veç këtyre materiale brenda në kuti, janë futur dhe manuale që vetë banka publikon si dhe një material me mbishkrimin “Libër i përpunimit të fondeve”.
Topat me spango
Për Ardian Bitraj, e rëndësishme ishte që kutia ku mbaheshin paratë të mos mbetej bosh,pas vjedhjes që ai kryente. Në 8 arkat që eksperti i policisë kriminale Fatos Konea ka fotografuar, ka pikasur se brenda në një arkë janë futur dhjetëra topa me spango. Në këtë arkë nuk është gjetur asnjë kartëmonedhë, pasi e gjitha ishte mbushur me topa spangoje.Në fotografimin që eksperti i bën të gjitha arkave del se në disa prej tyre janë futur dhe materiale të tjera si broshura të ndryshme, manuale, fletë palosje dhe libra. Të gjitha fotot janë pasqyruar në një tabelë fotografike nga eksperti i policisë kriminale, duke ia referuar më pas atë njësisë hetimore Task-Forcë, që drejton hetimet për skandalin e vjedhjes së 713 milardë lekëve të vjetra nga dega e Thasarit të Shtetit në Linzë. Fotografitë tregojnë se shumica e arkave të vjedhura nga Ardian Bitraj, janë të përgjysmuara nga lekët, ndërkohë në disa prej tyre nuk është gjetur asnjë kartëmonedhë. Në disa foto, Bitraj shfaqet duke u dalë nga ambjentet e zyrës së tranzitit të arkave, me një thes plastik të mbushur me para.
shqiptarja.com/d.i.
