Fatbardh Kadilli, ish-kandidat për kryetar i Partisë Demokratike, i ftuar në studion e “Debat” nga Alba Alishani, në A2 CNN, deklaroi se kreu i PD-së, Lulzim Basha, ‘ka humbur ndjenjën e turpit’, duke iu referuar deklaratës së tij se nuk ka humbur asnjë garë në karrierën e tij politike.
“Ndjej keqardhje të madhe për të gjithë mundin e demokratëve që nuk u shpërblye, për ata që dolën të votonin në 6 mars. Ata duhet të ndihen më të tradhtuar, për faktin që nuk iu dha një ofertë serioze. Po të kthehemi te reagimet e deputetëve të grupit parlamentar, dalloj 3 kategori. Njerëz që kanë lirinë e tyre, si zoti Gjekmarkaj apo Açka; njerëz si Bushati apo Sula, që vijnë nga vota lokale, që kanë qenë kritikë; dhe dyshja Duma-Salianji, që janë kalkulatorë politikë, të cilët tashmë kanë marrë një vendim për karrierën e tyre poltike. Të treja grupet janë të shëndetshme për partinë, pasi i japin kryetarit mesazhin e duhur”, tha Kadilli.
“Secili ka të vërtetën e tij dhe i shërben partisë. Basha ka humbur ndjenjën e turpit për atë që i ndodh. Nuk mund të dalë dhe të thotë që “nuk kam humbur asnjë garë”. Ne si PD po harrojmë të ndryshojmë. Ka një shumicë të heshtur në PD që nuk është zgjidhje sherri dhe konflikti, nuk është zgjidhja nëse e merr partinë Basha apo Berisha.
Shumica e heshtur pret një propozim me ndryshim, ata nuk kanë interes të rreshtohen me njërin apo tjetrin, por kanë nevojë për një propozim politik të ndryshëm. Berisha dhe Basha të mos hyjnë më në garë për kandidat partie, forumet le ta gjejnë liderin më të mirë të mundshëm”, shtoi Kadilli./m.j
