Shqipëria dhe Bullgaria ndajnë të njëjtat shqetësime, lidhur me situatën në Maqedoni. Kjo u nënvizua edhe gjatë një takimi që Ministri i Punëve të Jashtme Ditmir Bushati pati në Bullgari, ku u takua me Ministrin e Punëve të Jashtme të këtij vendi, Daniel Mitov.
Referuar këtyre zhvillimeve Ministri Bushati u shpreh se: “Shqipëria dhe Bullgaria, ndajnë të njëjtin vlerësim mbi krizën e shtetit të së drejtës në Maqedoni. Jemi të shqetësuar nga përpjekjet e fundit për të reduktuar dhe degraduar stabilitetin demokratik të vendit. Jemi të interesuar për një Maqedoni të paqtë, multietnike, të qëndrueshme e demokratike e cila mund të ecë përpara në proceset integruese euro-atlantike”.
Bushati ka nënvizuar se Shqipëria dhe Bullgaria mbështesim plotësisht qasjen e BE-së, SHBA-së e Gjermanisë dhe përpjekjet e tyre për të lehtësuar dialogun e nevojshëm politik, i domosdoshëm për të dalë nga kjo krizë. Duke u ndalur në bashkëpunimin në fushën e energjisë, dy Ministrat theksuan se është me rëndësi ndërlidhja energjetike midis Shqipërisë dhe Bullgarisë, nëpërmjet Maqedonisë, duke mundësuar në të ardhmen integrimin e rrjetit elektrik të rajonit me atë të BE-së.
(javanews.al) Me. Ar
