Ky fund shkurti dhe prag pranvere në Kukës, që përkon edhe me fundin e dimrit të pazakontë dhe me thatësirë, nuk ka dhënë efekte pozitive për sa i përket sasisë së ujit në liqenin e Fierzës.
Situata hidrike në liqenin verior nuk është optimale për të përballuar nevojat për prodhimin e energjisë elektrike me kapacitet të plotë në hidrocentralin e Fierzës.
Për shkak të mungesës së reshjeve, ka rënë ndjeshëm prurjet në dy lumenjtë kryesore që furnizojnë liqenin, Drin i Bardhë dhe Drin i Zi, të cilët bashkë me prurjet anësore nuk i kalojnë 80 metër kub ujë në sekondë, ndërsa niveli aktual është 274 metra mbi nivelin e detit nga 296 metra të kuotës optimale dhe kufirit maksimal të liqenit.
Aktualisht hidrocentrali i Fierzës punon me kapacitet të reduktuar për prodhimin e energjisë elektrike, me një ose dy turbina të alternuara dhe në orare të përcaktuara.
Nevojat për konsum të brendshëm për energji elektrike plotësohen nga hidrocentralet e tjera dhe burimet vendore të energjisë bashkë me një sasi të konsiderueshme energjie, e cila importohet nga tregu ndërkombëtar.
Të paktën deri në mesin e muajit mars nuk pritet ndonjë përmirësim i dukshëm i situatës hidrike, veçse në rast se do të rikthehen reshje të dendura shiu e në një periudhë të gjatë kohore.
Këtë dimër, si pasojë e reshjeve të pakta të dëborës, nuk u krijua edhe rezervat ujore në bjeshkët e Kukësit dhe Dibrës.
