Pas situatës së përmbytjeve me të cilat u përball vendi gjatë ditëve të fundit, gjendja ka nisur të stabilizohet në jug të vendit. Niveli i lumit Vjosë ka shënuar një rënie të ndjeshme, duke zbritur poshtë pikës kritike, çka ka sjellë uljen e prurjeve dhe tërheqjen graduale të ujit nga zonat e përmbytura.
Kjo ka ndikuar në uljen e rrezikut për përkeqësim të mëtejshëm të situatës. Kryeministri Edi Rama ka bërë të ditur se ka nisur procesi i verifikimit të dëmeve në të gjitha zonat e prekura.
“Niveli i ujit në lumin Vjosë ka rënë në mënyrë të ndjeshme. Ka filluar procesi i verifikimit të dëmeve në të gjithë zonën, ndërsa strukturat përkatëse mbeten në gatishmëri dhe në shërbim të plotë të të gjithë banorëve për çdo nevojë apo emergjencë”, ka shkruar kryeministri Rama.
Gjirokastra është një nga zonat më të prekura në jug të vendit. Si pasojë e reshjeve të dendura, janë shënuar rrëshqitje të mëdha dherash, të cilat kanë sjellë masa të konsiderueshme inerte dhe gurësh drejt lagjeve të qytetit. Gjithashtu, disa rrugë dhe banesa në fshatra janë dëmtuar për shkak të rrëshqitjeve të dheut.
Autoritetet vendore dhe strukturat e emergjencave vijojnë monitorimin e situatës dhe ndërhyrjet në zonat e prekura.
