Një javë afat i kanë lënë punonjësit e policisë së burgjeve Ministrisë së Drejtësisë dhe Drejtorisë së Burgjeve që të plotësojnë kërkesat e tyre, në të kundërt do të nisin protestat. Sipas kryetarit të sindikatës së punonjësve të burgjeve Valentin Maçaj, nëse ndodh një gjë e tillë vendi do të shkojë në kolaps.
“1 javë kohë do i lemë Ministrisë së Drejtësisë dhe Drejtorisë së Burgjeve për plotësimin e kërkesave tona. Në rast se punonjësit e policisë së burgjeve hyjnë në protestë vendi do të shkojë në kolaps”.
Kreu i sindikatës kërkoi marrjen e masave dhe plotësimin e kërkesave pasi, sistemit i burgjeve ka probleme të mëdha, duke nisur nga trajtimi financiar, kushtet e punës, deri tek uniforma dhe trajtimi ushqimor.
“Kemi probleme me pagat, problem me kushtet ne punë, mungon një mjek për stafin, mungojnë uniformat, nuk kemi një shkollë të mirëfilltë për trajnimin e policëve në burgje. Transporti është një tjetër problem”.
Plot 224 punonjës të policisë së burgjeve kanë firmosur një peticion drejtuar Ministrisë së Drejtësisë dhe drejtorisë së burgjeve ku kërkojnë plotësimin e kërkesave në të kundërt do të përshkallëzojnë protestën.
/a.r
