Policia federale austriake në rajonin e Salcburgut ka bërë një kontroll të befasishëm e të detajuar në dhomat e e hotelit ku ishte akomoduar skuadra e Teutës në Austri, e sinjalizuar edhe nga “Sportradar”, kompania që bashkëpunon me UEFA-n.
Katër ditë pas ndeshjes që skuadra durrsake humbi me rezultatin 7-2 ndaj Austrisë së Vjenës, forcat e rendit austriake, me urdhër të prokurorisë së Salcburgut, kanë ushtruar një kontroll të befasishëm në hotelin e saj në Mayrhofen.
“News.at” raporton se janë marrë në pyetje lojtarët, stafi dhe zyrtarë të klubit që ishin të pranishëm. Janë sekuestruar disa telefona celularë që ata kishin në përdorim si dhe shkresa të ndryshme, të cilat mendohet se mund të ndihmojnë për të zbardhur këtë ngjarje.
Të dhënat po hetohet nga ekspertët e departamentit të luftës kundër krimit të organizuar, të cilët kërkojnë të gjejnë lidhje të mundshme mes Teutës dhe mafies së basteve sportive. Brenda këtij departamenti është krijuar edhe një sektor i veçantë për bastet sportive, nga i cili ka dalë informacioni se për momentin të gjitha dyshimet bien mbi skuadrën shqiptare.
Hetimi në fjalë është bërë pas një sinjalizimi të dyfishtë, pasi përveç autoriteteve austriake, ndeshjet e Teutës kanë tërhequr edhe vëmendjen e “Sportradar”. Kjo e fundit është kompania që bashkëpunon me UEFA-n kundër manipulimeve të basteve sportive dhe që pas ndeshjes së parë me Riedin kishte sinjalizuar për lëvizjen e shumave të mëdha në këtë miqësore në dukje normale.
Hetimet janë konfirmuar zyrtarisht nga Ministria e Brendshme e Austrisë nëpërmjet një komunikate për shtyp, ku bëhet e ditur se çështja vazhdon të jetë nën shqyrtim.
Panorama Sport/d .i.
