Ministri turk i Mbrojtjes Hulusi Akar tha të mërkurën se Turqia dëshiron zgjidhje përmes dialogut të mosmarrëveshjes me Greqinë mbi kërkimet për naftë e gaz në Mesdheun lindor, por shtoi se Ankaraja do të mbrojë “të drejtat dhe interesat e saj” në rajon.
Turqia dhe Greqia, aleatë të NATO-s, kanë mosmarrëveshje të ashpra në pretendimet e tyre për burimet e mbivendosura energjitike në rajon. Tensionet janë rritur prej momentit që Ankaraja filloi operacionet e kërkimit në një zonë të diskutueshme të Mesdheut të hënën.
Greqia thotë se anija eksploruese e Turqisë, Oruc Reis, po vepron në mënyrë të paligjshme në ujërat që bien në shelfin kontinental të Greqisë, akuza që Ankaraja i ka hedhur poshtë.
Oruc Reis shoqërohej nga anije luftarake turke kur u largua nga porti për në det të hapur.
“Megjithë këtë, ne duam të besojmë se arsyeja do të mbizotërojë. Si në terren ashtu edhe në tryezë, ne jemi për zbatimin e ligjit ndërkombëtar, fqinjësinë e mirë dhe dialogun“, tha ministri Akar. “Ne duam të arrijmë zgjidhje politike me mjete paqësore, në përputhje me ligjet ndërkombëtare“, tha ai.
Ai tha se Turqia do të vazhdojë të mbrojë “të drejtat, marrëdhëniet dhe interesat e saj” në ujërat bregdetare. “Duhet të dihet se detrat tanë janë atdheu ynë blu. Çdo pikë është e çmuar”, tha zoti Akar.
Nderkohe lajmerohet se: Anija kërkimore turke “Oruc Reis” ka filluar të largohet nga zona ‘e nxehtë’ e Mesdheut Lindor, për të cilën ka pasur edhe tensione me shtetin grek edhe ditën e djeshme.
Sipas raportimeve të medieve greke anija turke po vazhdon rrugën e saj në lindje, brenda EEZ-së Qipro, megjithatë është akoma në kufijtë e NAVTEX ilegal të Ankarasë.
Shtabi i Përgjithshëm i Marinës bën me dije se anija turke e shoqëruar nga anije luftarake turke po lundron me një shpejtësi prej 4 nyje dhe po monitorohet nga afër nga anijet e Marinës Greke.
Lajmi u konfirmua gjithashtu nga Agjensia e Athinës:
“Sipas informacioneve të reja, anija kërkimore turke ‘Oruc Reis’ u largua nga territori Grek 20 minuta më parë dhe po lëviz në verilindje, brenda EEZ-së Qipriote, dhe brenda NAVTEX-it turk të lëshuar në mënyrë të paligjshme”.
Shihni pozicionin e anijes në hartën përkatëse:
