Është finalizuar një operacion për goditjen e trafikimit të personave dhe shfrytëzimit të prostitucionit në Fier.
Siç thuhet në njoftimin zyrtar të Prokurorisë, janë arrestuar pesë persona, përfshirë organizatorin O.P. dhe bashkëpunëtoren K.H., si dhe dy shtetase nga Uganda që punonin si prostituta. Ata akuzohen për gjashtë vepra penale, që nga shfrytëzimi për prostitucion e deri te armëmbajtja pa leje.
“Në kuadër të hetimeve të Prokurorisë pranë Gjykatës së Shkallës së Parë të Juridiksionit të Përgjithshëm Fier në bashkëpunim me shërbimet e policisë gjyqësore të Drejtorisë Vendore të Policisë, u arrestuan pesë persona, dy shtetase nga Uganda, ‘tutori’ dhe bashkëpunëtorët e tyre për veprat penale “Trafikimi i personave të rritur”, “Mbajtja e lokaleve për prostitucion” kryer në bashkëpunim, “Shfrytëzimi i prostitucionit”, “Veprime që pengojnë zbulimin e së vërtetës” kryer në bashkëpunim, “Prodhimi, mbajtja, blerja apo shitja e armëve të ftohta” kryer në bashkëpunim dhe “Moslëshimi i kuponit tatimor”, thuhet në njoftimin zyrtar.
Dy vajzat nga Uganda, kishin hyrë në vendin tonë në muajin mars 2024.
Ato rekrutoheshin fillimisht si kërcimtare “strip dance” dhe më pas duke përfituar nga kushtet ekonomike dhe sociale pranonin kryerjen e shërbimeve seksuale në zonën “prive” të lokalit.
“O.P., duke patur si qëllim të pengojë zbulimin e së vërtetës, gjatë periudhës së hetimeve pasi ka mbyllur për disa kohë lokalin, ka përdorur shtetasen O.G. si qirramarëse dhe administratore fiktive“, thotë Prokuroria.
