Më shumë se 1500 efektivë të të gjitha reparteve të Policisë së Shtetit do të jenë në terren gjatë gjithë periudhës së realizimit të Samitit të Komunitetit Politik Evropian.
Të dhënat e marra nga Policia e Shtetit saktësojnë, se bëhet fjalë për efektivë të Antiterrorit, Policinë Rrugore, të Krimeve dhe Rendit, por edhe të policisë Bashkiake të Tiranës, të cilët do të menaxhojnë të gjithë situatën si në aspektin e rendit dhe sigurisë ashtu edhe qarkullimit rrugor.
Vetëm në perimetrin e sigurisë, ku do të realizohet aktiviteti, në sheshin “Skënderbej”, policia thotë se ka planëzuar më shumë se 500 efektivë , të cilët do të vëzhgojnë të gjitha delegacionet e liderëve evropianë.
Një peshë shumë të rëndësishme të këtyre masave do të mbajnë agjentët e Shërbimit Informativ Shtetëror dhe Gardës së Republikës, të cilët mësohet se do të jenë ata që do të skanojnë gjithçka çfarë ndodh në perimetrin e sigurisë, por edhe në pika kyçe, të cilët më herët duhet theksuar se kanë bërë një analizë të situatës dhe shkëmbim informacionesh me homologët e tyre.
Policia, edhe gjatë prezantimit të planit të masave dy ditë më parë, tha se rrugët do të bllokohen pasditen e së enjtes dhe gjatë gjithë ditës së premte, sidomos akset rrugore nga Aeroporti drejt vendqëndrimeve të delegacioneve, apo edhe rreth mjediseve ku ata do të akomodohen dhe aty ku do të bëjnë takimi.
47 liderë të Bashkimit Evropian dhe vendet partnere do të mbërrijnë në kryeqytet, sot (15 maj) ku do të priten në një darkë nga kryeministri Edi Rama një ditë para samitit të Komunitetit Politik Europian, që do të mbahet më 16 maj.
