Shmangia e aksidenteve rrugore, por edhe të trafikut shpesh herë të pajustifikuar në kryeqytet, kërkon jo vetëm zbatimin e rregullave të qarkullimi nga drejtuesit e automjeteve, por edhe një kulturë qytetare për të respektuar sinjalistikën e nevojshme dhe vendet e përcaktuara për kalimin e rrugëve.
Për këtë qëllim Bashkia e Tiranës njofton se ka ndërmarrë një sërë hapash për të disiplinuar qytetarët gjatë lëvizjes në akset dhe kryqëzimet kryesore për të shmangur çdo mundësi që sjell rrezikimin e jetës.
Kështu veç vijëzimit të rrugëve dhe vendkalimeve të qytetarëve, në të gjitha kryqëzimet kryesore në Tiranë po vijon puna për vendosjen e kangjellave për të orientuar qytetarët drejt vijave të bardha.
“Shpesh s’janë veç makinat problemi, po dhe këmbësorët që kalojnë rrugën kuturu. Kangjella mbrojtëse për t’i detyruar disa të ecin ku duhet”, shkruan kryetari i Bashkisë së Tiranës, Erion Veliaj sot në twitter, ku dhe ka postuar disa foto nga puna që po bëhet për vendosjen e kangjellave mbrojtëse dhe orientuese.
