Policia e Prokuroria e dinin, por nuk e publikuan për median asnjëherë faktin se mjeti nga i cili u qëllua për vdekje Denis Kasa në Mbrostar të Fierit ishte i vjedhur në Lezhë. Madje makina i ishte vjedhur një funksionari të lartë lokal. Prokuroria gjithnjë i mëshonte faktit se mjeti ishte i marrë me qira në Tiranë dhe se kishin prova pikërisht dokumentet e agjencisë. Por në fakt, rreth një muaj pas asaj ngjarjeje të rëndë, i zoti i mjetit A.Pepa denoncon ngjarjen për gazetën “Shekulli”.
Pepa shpjegon me detaje se si ishte zhdukur mjeti në parking. Në fakt, në Lezhë vjedhjet dhe grabitjet janë më se të zakonshme e gati janë bërë të natyrshme, ndaj edhe policia nuk është se e ka marrë seriozisht denoncimin e zyrtarit lokal, edhe pse pas vrasjes, Pepa u thirr në polici dhe u vu në dijeni, se mjeti që ai kishte denoncuar se i ishte vjedhur në shtëpi, ishte gjetur i djegur në aksin Fier-Lushnje dhe se atentatorët kanë qëlluar nga ky mjet në makinën e Denis Kasës dhe të dy miqve të tij. Në atë pritë fatale, jo vetëm humbi jetën Kasa dhe u plagosën dy miqtë e tij, por Prokuroria dhe Policia nisën grupet më profesioniste në drejtim të Fierit dhe të Vlorës për të zbuluar ngjarjen e rëndë. U arrestuan disa persona, po asnjë si person që ka kryer vrasjen, ndërsa policia dhe prokuroria pak ditë më parë kanë pranuar publikisht se mjeti i vrasjes ishte vjedhur në Lezhë.
Më në fund është arrestuar hajduti dhe tashmë pritet të shkojë në pranga edhe personi që e ka blerë makinën që më pas nuk dihet se si ka përfunduar në duart e vrasësve. Blutë e Lezhës dhe Fierit kanë arrestuar 41-vjeçarin Sokol Cali, banor i Lezhës, i cili akuzohet se ka bashkëpunuar për të siguruar mjetet e krimit. Cali ia ka shitur makinën që e kishte marrë nga Kreshnik Bardhi, autorëve të vrasjes. 41- vjeçari pritet të japë dëshminë e tij, e cila do të sigurojë prova të tjera për autorët dhe porositësit e vrasjes. Pak ditë më parë policia e Lezhës arrestoi një 29-vjeçar për vjedhje mes të cilave edhe makina që u përdor në vrasjen e Denis Kasës në Mbrostar me 8 janar të këtij viti.
ma.me
