Detaje te reja kanë dalë në dritë nga ngjarja e djeshme e ndodhur në Tiranë ku u vra Kudret Saliaj, dhe mbeti i plagosur avokati i tij Adriatik Camaj.
Sipas burimeve nga Policia Tiranës bëhet me dije se Dhurata Saliaj (bashkëshorja e viktimës, në proces divorci) ka qenë në lokalin ku ka ndodhur ngjarja e rëndë. Hetuesit thonë se Dhurata Saliaj, ka qenë në rolin e vëzhgueses duke informuar babanë e saj, Mexhit Picari mbi lëvizjet e viktimës.
Rezulton sipas policisë, se vajza ka njoftuar Mexhit Picarin dhe ku i fundit i pajisur me armë zjarri TT, ka shkuar në lokal dhe ka qëlluar me disa plumba Kudret Saliaj.
Sakaq është zbardhur dhe dëshmia e Dhurata Saliajt, e cila u arrestua dje së bashku me të atin e saj Mexhit Picarin, si bashkëpunëtore në krim.
“Me Kudretin kemi pasur marrëdhënie të acaruara, sa herë që doja të takoja fëmijët na kërcënonte. Kudreti kërcënonte se do të më vriste. Rasti më i fundit ka ndodhur përpara katër ditësh, ku ai na ka kërcënuar. Kur vinte në shtëpi përballej me mamin tim. Familja ime ka jetuar në presion prej kaq shumë kohësh”, është shprehur Dhurata Saliaj.
Mes të tjerave Dhurata Saliaj ka thënë se e ëma e saj kishte urdhër mbrojtje nga viktima, dhe se gjatë ditës së djeshme babai e kishte shoqëruar për në Gjykatë, pasi i frikësohej Kudretit, se mund të hakmerrej ndaj saj.
“Kam shkuar me babain tek gjykata dhe ja kam bërë të qarte Kudretit se unë femijet nuk i lë. Doja të takoja djalin, t’i flisja. Aty ndodhi edhe ngjarja”, ka thënë më tej Dhurata Saliaj.
Historia e konfliktit mes çiftit Kudret dhe Dhurata Saliaj ka nisur në fundin e vitit të kaluar, ku ata janë përfshirë në akuza të ndërsjellta për tradhëti dhe dhunë, ndërkohë që viktima nuk e lejonte bashkëshorten e tij që të shihte tre fëmijët e mitur, të cilët jetonin me të atin
/b.h
