Dy denoncimet e fundit që janë shënuar në adresë të Emiljano Shullazit dhe të Gilmando Danit duket se kanë rënduar pozitën e tre të arrestuarve nën një mori akuzash të rënda. Dita e djeshme ka shënuar seancën e radhës në ngarkim të tyre, seancë që në fakt nga ana e të arrestuarve konsiderohej si seanca në të cilën duhej të fitonin lirinë. Mirëpo prokurori ka këmbëngulur se të gjitha aktet që disponon prokuroria po hetohen dhe dyshohet se janë të vërteta në lidhje me akuzat.
Kështu deri në përfundim të të gjitha hetimeve është kërkuar që Shullazi, bashkë me kushëririn dhe shokun e tij, duhet të hetohen në masën sigurisë arrest me burg pa afat. Dy nga tre personat e vënë nën akuza, jo vetëm nga ana e prokurorisë, por edhe nga ana e politikës dhe e biznesmenëve që nuk iu dihet ende emri, nuk kanë marrë pjesë në seancën gjyqësore, ndërsa avokatët kanë kundërshtuar të gjitha pretendimet e akuzës dhe po ashtu kanë kontestuar edhe vendimin e Gjykatës së Apelit për Krime të Rënda, që ka lënë në fuqi vendimin e shkallës së parë.
Vetëm Gilmando Dani ka mbërritur nga burgu i Fushë-Krujës për t’i thënë gjykatës së Apelit atë që tha edhe në Gjykatën e Shkallës së parë. Sapo ka përfunduar seanca gjyqësore, mbrojtësi i Emiljano Shullazit ka vijuar sërish të dëshmojë publikisht faktin se klienti i tij, jo vetëm që është i pafajshëm, por madje arrestimi dhe akuzat ndaj tij janë të pabazuara në asnjë fakt dhe asnjë provë.
Seanca
Në kohën kur prokuroria ka dokumentuar një dëshmi të një qytetareje, e cila ka dhënë fakte e prova se si “ka dorëzuar” pronën e saj në duart e Emiljano Shullazit dhe të Gilmando Danit, ku ky i fundit është edhe pronari i “ligjshëm” i saj, Emiljano Shullazi vjen në Tiranë dhe kërkon në Apel lirimin e tij, pasi sipas tij dhe avokatit mbrojtës, po mbahet në qeli pa asnjë provë. Mirëpo Gjykata e Apelit e ka rrëzuar kërkesën e avokatëve të Emiliano Shullazit, Gilmando Danit dhe Blerim Shullazit, duke lënë në fuqi vendimin që u mor dy javë më parë nga Gjykata e Shkallës së Parë për Krime të Rënda, ndërsa Dani sërish ka këmbëngulur para gjykatës se ai ka shkuar vetë në polici dhe nuk është policia që e ka arrestuar.
Trupi gjykues e ka konsideruar të pabazuar kërkesën e 3 personave të arrestuar nën një mori akuzash dhe të dyshuar edhe si pjesëtarë të një grupi të strukturuar kriminal. Por ndërsa Emiliano Shullazi mungonte, duke deleguar që ta përfaqësonte mbrojtja, avokatët e tij i thanë Gjykatës së Apelit se, nuk ka asnjë kallëzim ndaj 38-vjeçarit për rastet që janë paraqitur në Shkallën e Parë. Por, për Prokurorinë e Apelit, dyshimet janë të forta dhe po kryhen veprime të mëtejshme hetimore, ndërsa mbajtjen nën këtë masë arresti, Gjykata e ka justifikuar me faktin se tre personat duhet të qëndrojnë në burg për shkak se ekziston rreziku i largimit jashtë vendit. (shekulli / a.r)
