Shullazi kërkon ballafaqim me Berishën, Krimet e Rënda thërrasin ish-kryeministrin.
Jo vetëm Saimir Tahiri por edhe vetë Emiljano Shullazi ka kërkuar sot në seancën gjyqësore thirrjen e ish-kryeministrit Sali Berisha si dëshmitar në lidhje me rastin e kërcënimit të rektorit të UT, Mynyr Koni.
Mësohet se Gjykata e Krimeve të Rënda ka pranuar kërkesën e Shullazit dhe i ka dërguar një fletëthirrje ish-kryeminsitrit Berisha.
***
Ish-ministri i Brendshëm Saimir Tahiri ka dëshmuar sot në procesin gjyqësor ndaj Emiljano Shullazit. Në fjalën e tij, Tahiri ka ngritur pikëpyetjen se përse është marrë nën cilësinë e dëshmitarit, ndersa tha se duhet thirrur Sali Berisha të dëshmojë.
Sipas ish-ministrit, në lidhje me kërcënimet ndaj Mynyr Konit ai është njohur përmes deklaratave të Berishës.
Në formë batute, prokurorja e çështjes është përgjigjur se “ne besojmë te policia”.
Ndërkohë, dekani i Fakultetit të Ekonomisë, Dhori Kule, është larguar nga seanca pa dëshmuar.
Në gjyq janë dhe ish-ministri Saimir Tahiri, kryepolici Haki Çako dhe deputeti Shezai Rrokaj, të cilë pritet të dëshmojnë mbi këtë çështje. Ndërsa ende nuk i janë përgjigjur fletëthirrjes së prokurorit Mynyr Koni, Klodeta Dibra dhe Majlinda Keta.
Në prill 2016, ish kryeministri Berisha denoncoi në media se Mynyr Koni ishte kërcënuar me jetë për t’u tërhequr nga gara për Rektor në Universitetin e Tiranës, e pas kësaj akuze me kërkesë të Prokurorisë u arrestua Emiliano Shullazi.
***
Në Gjykatën e Krimeve të Rënda ka nisur paraditen e sotme seanca gjyqësore me dëshmitarët VIP në çështjen ndaj Emiljano Shullazit, i cili akuzohet për kërcënimin e rektorit Mynyr Koni. Në këtë seancë, Gjykata ka vendosur të thërrasë për të dëshmuar një sërë zyrtarësh.
Bëhet fjalë për ish-ministrin e Brendshëm Saimir Tahiri, kreun e Policisë së Shtetit Haki Çako, ish-rektorin Dhori Kule dhe rektorin Mynyr Koni. “BalkanWeb” mëson se Tahiri, Kule dhe Koni të dëshmojnë në seancë për kërcënimet gjatë zgjedhjeve në universitet.
Në seancë janë paraqitur Mynyr Koni, Haki Çako, Dhori Kule, Majlinda Keta dhe Shezai Rokaj.
Ndërsa ish-ministri Tahiri nuk është paraqitur ende. Nëse Tahiri do të pranojë të paraqitet në seancë, kjo do të ishte e para herë që dëshmon një ish-zyrtar i lartë në lidhje me çështjen “Shullazi”, pasi deri tani kanë dëshmuar vetëm biznesmenë apo persona të dyshuar. /b.d
