Seancat gjyqësore për caktimin e masës së sigurisë të arrestit ndaj të arresturve Emiljano Shullazi, Blerim Shullazi dhe Gilmando Dani janë zhvilluar të qeta, veç një shkëmbimi arsyetimesh lidhur me mënyrën e arrestimit të Gilmando Danit nga policia e Tiranës.
”Shqiptarja,com”, ka mësuar nga burime pranë gjykatës se gjatë momentit të leximit të pretendimeve nga përfaqësuesit e prokurorisë lidhur me rastin e ndalimit të Gilmando Danit, pasi akuza u shpreh se ky shtetas është arrestuar dhe kërkoi nga gjykata që arrestimi të jetë i ligjshëm, Dani ka reaguar duke pohuar se nuk është arrestuar nga asnjë efektiv policie, kjo pasi ai ka shkuar vetë në Drejtorinë e Policisë së Tiranës.
“…Nuk më ka ftuar askush nga policia dhe askush nuk më ka arrestuar. Kam shkuar vetë në polici, sapo jam njoftuar nga një shok se shoku im ishte shoqëruar në polici. Kam marrë kontakt me policin e sportelit duke u interesuar për arsyet e shoqërimit të Emiljanit. Pas kësaj polici i shërbimit pasi ka biseduar me shefat e tij në telefon më ka pohuar se duhet të shkoja lart për t’i takuar dhe sqaruar. Më ka dhënë një ftesë hyrëse, të cilën e kam mbajtur të varur në qafë. Sapo kam shkuart lart, më kanë pohuar se dhe unë isha i dyshuar dhe se duhet të flisnin me Prokurorin e Krimeve të Rënda, për të bërë verifikimet e duhura…”-është shprehur i ndaluari Dani në gjatë procesit të caktimit të masës së sigurisë në Gjykatën e Krimeve të Rënda.
Ky ka qënë i vetmi rast kur ai ka reaguar, ndërkohë që dy të arrestuarit e tjerë Emiljano dhe Blerim Shullazi nuk kanë thënë asnjë fjalë veç gjeneraliteteve të tyre.
