Shtyhet gjyqi ndaj Armando Prengës në Gjykatën e Lartë. Në seancë munguan avokatët e çështjes ‘Prenga’ dhe një anëtar i trupit gjykues.
Më 31 Tetor, është vendosur seanca e rradhës. Sot ishte seanca e parë e Prengës pas ndërprerjes së gjyqit në korrik 2016.
Deputeti Armando Prenga është dërguar si i pandehur në Gjykatën e Lartë për tri vepra penale, “prodhim dhe mbajtje pa leje të armëve luftarake”, “plagosje të lehtë me dashje” dhe “kanosje”. Sipas Prokurorisë së Përgjithshme, ai ka qenë i pranishëm në konfliktin fizik të ndodhur para Komisariatit të Policisë së Kurbinit mes fiseve Prenga e Cali, me zanafillë të drejtën e shfrytëzimit të Lagunës së Patokut, shkruan panorama.
“Përpara Komisariatit të Policisë ka ardhur shtetasi Armando Prenga, i shoqëruar nga vëllai i tij Edmond Prenga, shtetasi Gazmir Jushi etj. Këta shtetas kanë filluar të konfliktohen fizikisht, duke u goditur me grushte me pjesëtarët e familjes Cali. Më pas, shtetasi Armando Prenga ka qëlluar me armë zjarri tip pistoletë. Nga të shtënat me pistoletë është plagosur në këmbë shtetasi Tom Cali.
Gjithashtu, gjatë këtij konflikti janë përdorur edhe armë të ftohta, nga ku janë dëmtuar shtetasit Gazmir Pjetër Jushi, Eduart Ndue Prenga, Gjergj Cali dhe Nikoll Cali”, thuhet në dosjen e Prokurorisë. Deputeti Prenga ka mbajtur qëndrim mohues për akuzat dhe duke pretenduar se nuk ka qenë prezent në këtë konflikt.
