Indeksi i çmimeve të konsumit në muajin Nëntor 2015, arriti 118,5 % kundrejt muajit Dhjetor 2007 (Dhjetor 2007=100), sipas INSTAT.
Në muajin Nëntor 2015 ndryshimi vjetor i indeksit të çmimeve të konsumit është 2,1 %. Një vit më parë ky ndryshim ishte 1,7 %. Pavarësisht rritjes, inflacioni mbetet nën objektivin e shënjestruar të Bankës së Shqipërisë prej 3%.
Ndikimi i grupeve kryesore në ndryshimin vjetor të indeksit të çmimeve të konsumit.
Rritja vjetore në muajin Nëntor 2015 është ndikuar kryesisht nga grupi “Ushqime dhe pije joalkoolike” me +2,30 pikë përqindje. Çmimet e grupit “Pije alkoolike dhe duhan” kanë kontribuar me +0,12 pikë përqindje. Çmimet e grupit “Shërbimi arsimor” kanë kontribuar me +0,07 pikë përqindje. Çmimet e grupit “Hotele, kafene e restorante” dhe “Argëtim e kulturë” kanë kontribuar me nga +0,03 pikë përqindje secili.
Çmimet e grupit “Qira, ujë, lëndë djegëse dhe energji” kanë kontribuar me -0,28 pikë përqindje. Çmimet
e grupit “Veshje dhe këpucë” kanë kontribuar me -0,20 pikë përqindje. Çmimet e grupit “Transporti” kanë kontribuar me -0,17 pikë përqindje. Çmimet e grupit “Shëndeti” kanë kontribuar me -0,05 dhe çmimet e grupit “Komunikimi” kanë kontribuar -0,02 pikë përqindje.
Ndryshimet vjetore të grupeve kryesore: Krahasuar me muajin Nëntor 2014, rritja më e madhe e çmimeve vërehet në grupin “Ushqime dhe pije joalkoolike” me 5,9 %, pasuar nga grupi “Shërbimi arsimor” me 4,8 %, grupi “Pije alkoolike dhe duhan” me 3,3, etj. Brenda grupit të ushqimeve çmimet e nëngrupit “zarzavate përfshirë patatet” u rritën me 35,6 %, pasuar nga nëngrupi “fruta” me 13,9 %, nëngrupi “vajra dhe yndyrna” me 2,4 %, nëngrupi “sheqer, reçelna e ëmbëlsira” me 1,1 %, etj. Çmimet e nëngrupit “qumësht, djath e vezë” u ulën me 4,4 %, pasuar nga nëngrupi “mish” me 0,8, grupi “kafe, çaj e kakao” me 0,6 %, etj. Ndërsa, ulja më e madhe e çmimeve vërehet në grupin “Veshje dhe këpucë” me 4,0 %, pasuar nga grupi “Transporti” me 2,8 %.
Ndryshimi mujor i indeksit është -0,3 %. Krahasuar me muajin Tetor 2015, ulja më e madhe mujore vërehet në grupin “Transporti ” me 1,2 %. Krahasuar me muajin e mëparshëm çmimet e Eurodiezelit u ulën me 2,9 % dhe çmimet e benzinës me 3,2 %./Monitor
